HATAW! D'yaryo ng Bayan hatawtabloid.com
“I NFLUENCER full of beauty and purpose.” ‘Yan ang isa sa mga pinaulan ng netizens na papuri sa sexy celebrity na si Ivana Alawi na sa wakas ay nakaisip din ng prank (biro) na may saysay at kabuluhan.
Sa latest vlog ng Pinay-Moroccan, ibinunyag n’yang nagpanggap siyang pulubi at iba’t iba ang idinadahilan n’ya kung bakit siya namamalimos. At sa bawat magbigay ng limos, agad n’ya itong pinapalitan ng higit na mas malaking pera.
‘Pag piso ang ibinigay, P1,000 ang kapalit. ‘Pag P10, P10k ang kapalit. May isang mama na napadaan lang sa isang gasolinahan na ipinabarya pa ang pera n’ya lang malimusan ang “pulubi.”
Sampung piso ang ibinigay ng mama, kaya’t P10,000 ang ipinalit ni Ivana.
May isang magpuputo na pinalitan ni Ivana ng P20K ang P20 na limos sa kanya. Una muna ay binibili ni Ivana ng puto roon mismo sa mama ang P20 na inilimos sa kanya. Inalok pa siya ng mukhang lolo nang mama na ibibili ng softdrinks o tubig man lang.
Tumanggi si Ivana na ibili pa siya ng kung ano. Sa halip ay inalok ni Ivana ng P20K ang matanda na tumatanggi pa sanang tanggapin ‘yon.
May isang mama na binigyan siya ng P2 kaya pinalitan n’ya ng P2K. Nakita ‘yon ng isang babaeng tindera na tumangging maglimos sa kanya at inggit na inggit ang ale roon sa mama.
Sinubukan ng ale na makahingi rin kay Ivana at nagdahilan pa itong kaya ‘di n’ya naisip na maglimos ay dahil malinis naman ang itsura nito bilang isang “pulubi.”
Hindi naman nakipagtalo si Ivana sa kanya. Maayos na nagpaalam lang ang vlogger na may 12 milyon nang subscribers doon sa ale.
Hindi namin natapos panoorin ang mahaba-habang vlog ni Ivana kaya ‘di namin nabilang kung ilan lahat ang nabigyan n’ya ng pera.
Kuwento n’ya sa kanyang vlog kung bakit n’ya naisip na gawin ang pagpapanggap na ‘yon: ”Kasi araw-araw ‘pag lumalabas ako may nakikita akong mga taong kumakatok sa bintana, nanghihingi, may dala pang bata minsan, may dalang matanda. Kasi mahirap talaga ang buhay at dumoble pa ang hirap noong nagka-pandemya tayo. Gusto ko maranasan ano ‘yung feeling nila and also rewarding the people who helped out.”
Alam naman ni Ivana na ang bawat ginagawa ng isang tao na kabutihan para sa iba ay ibinabalik din ng Diyos.
Paliwanag at pakiusap n’ya sa madla. ”In life kapag nagbigay ka sa mga taong nangangailangan, laging ibinabalik ni Lord ‘yun,” she maintained.
“Please let’s help out our kababayans and let’s help out Philippines ’cause I believe we will be a better country. I hope this video inspires you na tumulong in your own small way sa ating mga kababayan.”
Of course, the comment section was immediately filled with positive feedback, mostly praising Ivana for her “golden heart.”
“Faith in humanity restored,” one comment read.
“May this vid become a trend. Not only in socmed but also in real life regardless of our social status,” another added.
Habang isinusulat namin ito, mahigit isang milyong tao na ang nag-view ng vlog ni Ivana. At ang dami na ring kumopya ng vlog n’ya at ang mga kumopyang ‘yon ay iponost din sa You Tube channel nila na parang sila ang may kuha niyon.
KITANG-KITA KO
ni Danny Vibas
