‘Aleng Pulis’ nawawala sa Cagayan

PINAGHAHANAP ng kaniyang mga kabaro ang isang babaeng pulis na nakatalaga sa bayan ng Lasam, lalawigan ng Cagayan, na naiulat na nawawala simula noong Huwebes, 18 Pebrero.

Kinilala ang nawawalang kagawad ng pulisya na si P/MSgt. Jovelyn Camangeg, 40 anyos, residente sa Centro 2, ng naturang bayan.

Ayon kay P/Lt. Col. Amdree Abella, tagapagsalita ng Police Regional Office 2, iniulat sa PRO 2 Headquarters ni Jemma Camangeg, 49 anyos, na nawawala ang kanyang kapatid na si Jovelyn.

Ayon kay Jemma, katatapos dumalo ni Jovelyn sa Integrated Transformation Program Seminar (ITP) sa pamamagitan ng Zoom mula 11-17 Pebrero.

Umalis umano ang kapatid dakong 5:00 am noong Huwebes patungo sa lungsod ng Tuguegarao upang mag-apply ng loan at kunin ang kanyang inorder na kape na ihahatid niya sa bayan ng Solana.

Huling nakitang nagmamaneho si Camangeg ng kaniyang kulay kahel na Toyota Wigo, may conduction sticker na BA1788, nakasuot ng maong na pantalon at berdeng kamiseta na may tatak na “Pulis.”

Mula rito ay hindi na nakauwi si Jovelyn at ‘out of coverage’ na ang kanyang cellphone, ayon sa kanyang kapatid.

Samantala, sinabi ni Abella na hindi titigil ang Cagayan Valley police para matukoy kung nasaan ang Aleng Pulis.