HATAW! D'yaryo ng Bayan hatawtabloid.com
UMARANGKADA na kahapon ang voter registration na iniabiso ng Commission on Elections (Comelec) nitong nakaraang Lunes, 31 Agosto 2020.
Actually ang terminong ginamit ng Comelec ay ‘resume.’ Ibig sabihin ay itinuloy lang nila ang naantalang rehistrasyon dahil sa pandemyang CoVid-19.
Ayon kay Comelec spokesperson, Director James Jimenez, ang paghahain ng aplikasyon ay mula Martes hanggang Sabado, kabilang ang holidays, mula 8:00 am hanggang 3:00 pm, sa Office of the Election Officer (OEO) gaya ng sinasabi sa advisory nitong 31 Agosto.
Pinapayohan ang mga magrerehistro na i-download ang application form sa Comelec website (www.comelec.gov.ph) saka ito sagutin at magdala ng sariling panulat o ballpen bilang pag-iingat laban sa CoVid-19. Sa harap ng Election Officer sa Comelec office lalagdaan ng aplikante ang kanyang application form.
Ipinatutupad din ng Comelec ang “No Face Mask and Face Shield, No Entry” policy sa mga magpaparehistro.
Maaari lamang hubarin ang face mask at face shield Kapag nakasalang na sa biometrics procedure.
Lilimitahan din ng Comelec ang mga aplikante sa bawat araw.
At gaya ng paggamit ng face mask at face shield, mahigpit na oobersbahan ang physical distancing, checking ng body temperature, sanitasyon ng kamay at sapatos o iba pabng sapin sa pa.
Malinaw naman ang ibinabang kautusan at patakaran ng Comelec.
Pero ang tanong, tila ‘napakaaga’ naman ng aktibidad na ‘yan ng Comelec. Napakaaga na ang ibig nating sabihin ay hindi pa klaro ang panahon.
Napatag na nga ba ang kurbada ng pandemya? Bumagsak na ba talaga ang bilang ng mga nahahawa? May katiyakan na bang tuluyan nang mamamatay ang virus na CoVid-19?
Alam nating hindi pa tiyak, ang mga sagot sa mga tanong na ito. Wala pa tayong ‘assurance’ na tuluyan na ngang maglalaho ang CoVid-19.
E bakit kailangan maglunsad ng ganito ‘kapanganib’ na hakbang ang Comelec?!
Ang voter registration ba ay ‘singbigat’ ng buhay at kamatayang desisyon ng isang indibidwal?! Na kung hindi siya magrerehistro ngayon ay hindi na siya makapagrerehistro sa mga susunod na panahon?
May masisira ba sa sistema ng pamahalaan kung huwag munang ituloy ang voter registration?!
‘Mababaog’ ba ang mga tao sa Comelec kapag hindi nagsagawa ng voter registration sa panahon na nasa pandemya ang bansa?!
Director James Jimenez, Sir, may hinahabol ba ang Comelec? May quota ba kayong dapat punuin? E paano pala kung biglang maging ‘epicenter’ ng CoVid-19 ‘yang opisina ninyo? (Huwag naman po sana!)
Bakit hindi?! Ang biometrics po ay kukunin sa mata at daliri. Puwede bang linisin ng alcohol ang machine na gagamitin sa biometrics?
Hindi ba’t ang CoVid-19 ay unang nananahan sa mata, ilong, bibig, at mga kamay?!
Unsolicited advice lang po, ang voter registration ay maaaring maghintay. Maaari itong itigil muna hangga’t walang katiyakan ang panahon.
Kung hindi naman puwede, hindi ba maaring isabay na lang ito sa census? Hindi ba puwedeng magdala camera para makuha ang biometrics ng mga magpaparehistro?
Sa palagay natin, mas makabubuting punan ninyo ang backlogs sa pag-iisyu ng voter’s ID. Ilang taon na ang nakalipas, halos mag-iisang dekada na pero hanggang ngayon wala pang natatanggap na voter’s ID ang mga nag-apply sa inyo.
Ang inyong lingkod ay isa sa mga hanggang ngayon ay hindi pa naiisyuhan ng voter’s ID.
‘Yan ang dapat ninyong unahin, Director James! Hindi ‘yung registration na naman pero wala naman kayong maibigay na ID.
Ay sus!
Ang buhay ng tao kapag iginupo ng CoVid-19, wala na!
Ikaw ba, Director James, handa ka bang isugal ang buhay mo sa isang pandemyang wala kang kalaban-laban?
Kung ang sagot mo ay hindi, puwes ganoon din ang gusto ng mga mamamayang Filipino na ‘binuyo’ mong magparehistro kahit hindi pa sigurado ang panahon.
Kung ang sagot mo naman ay oo, puwes, mauna kang mag-isa mo…
Adios!
MAYOR ISKO NAGHAMON
NG P.1-M INCENTIVE
PARA SA MGA BARANGAY
NA “NO CoVid-19 CASES
TINGIN natin ay magandang panghikayat ang hamon ni Mayor Francisco “Isko Moreno” Domagoso na P100,000 insentibo sa mga barangay na walang bagong kaso ng CoVid-19 mula 1 Setyembre hanggang 31 Oktubre.
Sa post sa kanyang Facebook page noong Lunes ng gabi, sinabi ni Mayor Isko na inutusan niya si Vice Mayor Honey Lacuna na maglaan ng P89.6 milyon para sa nasabing incentive program.
“In the next two months, starting September 1 and ending on October 31, kapag wala pong nairehistro na infection, walang new case sa barangay ninyo, magkakamit ang inyong barangay ng P100,000 incentive,” pahayag ni Isko para sa 896 barangays.
“Ang goal natin ay zero CoVid-19 infection for two months sa (Our goal is zero COVID-19 infection for two months in the) barangay, and I believe that you can do it. That is why we want to give you incentive,” anang Alkalde.
Ang mga opisyal ng matatagumpay na barangay ay pagkakalooban ng certificates of recognition para sa kanilang mga pagsisikap.
Pero may ilang devil’s advocate na nagsasabing ang P100,000 insentibo sa barangay ay baka maging dahilan para magsinungaling sa pag-uulat ang ibang barangay.
Mukhang may punto rin. Baka imbes maging susi para paghusayin ang monitoring sa kanilang mga barangay at maging maagap sa pagsugpo ng CoVid-19 ay itago pa nga naman?!
Anyway, baka puwede namang hayaan muna nating ipatupad ang nasabing programa at magtulungan kung paano ito magtatagumpay, bago barilin at tuluyang isantabi. Malaking bagay din at makatutulong ang P.1-milyon o P100,000 para sa bawat barangay.
Hindi ba puwedeng bigyan muna natin ng tsansa at makipagtulungan ang bawat mamamayan at barangay para magtagumpay ang nasabing proyekto?!
Tumulong para magtagumpay!
