HATAW! D'yaryo ng Bayan hatawtabloid.com
KINOMPIRMA ni Senate Committee on health chairman, Senator Christopher “Bong” Go na desidido si Pangulong Rodrigo Duterte na ipakulong ang mga tiwali sa Philippine Health Insurance Corp., (PhilHealth).
Sinabi ni Go na isa siya sa mga nag-suggest na magtatag ng task force na mag-iimbestiga sa mga katiwalian sa ahensiya katuwang ang Civil Service Commission (CSC) para mapilayan ang mga empleyadong sangkot, habang ang Ombudsman ang bahala sa preventive suspension at pagsasampa ng kaso, Commission on Audit (COA) para magsagawa ng audit sa pondo at Department of Justice (DOJ) para sa lifestyle check sa mga empleyado.
Aminado si Go na kailangan ng overhaul ng ahensiya base sa kanilang mga nakikitang problema sa PhilHealth.
Ayon kay Go, sistematiko na nakalulusot sa ibaba ang mga iregularidad na dahilan ng pagnanais ni resign PhilHealth President & CEO Ricardo Morales na i-upgrade ang IT system dahil huling-huli na hindi pa naaayos ang mga data lalo sa regional level.
Binigyang diin ni Go na hindi niya matanggap na halos walang katapusan ang problema sa PhilHealth.
Sa termino ni Duterte ay limang president/CEO na ang kanyang naitatalaga.
Dagdag ni Go, ayaw niyang dumating ang panahon na hindi matutulungan ng PhilHealth ang mahihirap na Filipino dahil wala na itong pondo bunsod ng korupsiyon.
Umaasa si Go na silent worker ang bagong itatalagang President/CEO ni Pangulong Duterte at malilinis nito ang ahensiya at maibabalik ang integridad ng PhilHealth. (NIÑO ACLAN/CYNTHIA MARTIN)
