HATAW! D'yaryo ng Bayan hatawtabloid.com
ARESTADO ang dalawang hinihinalang drug pusher at nakuha sa kanila ang 25 transparent plastic sachet na naglalaman ng shabu sa buy bust operation na ikinasa ng mga awtoridad kamakalawa ng hapon, 17 Agosto, sa bayan ng Montalban, lalawigan ng Rizal.
Kinilala ni Rizal PNP Provincial Director P/Col. Joseph Arguelles ang mga nadakip na suspek na sina Alexander Rañada, alyas Asiong, nasa hustong gulang at nakatira sa Blk. 15 Lot 63 Phase 1-B, Kasiglahan, Barangay San Jose; at Shiwon Guibone, 20 anyos, na sinabing binabagsakan ng droga ni alyas Asiong.
Nasakote ang mga suspek dakong 3:00 pm noong Lunes, sa Daang Bakal St., Barangay Manggahan, sa nabanggit na bayan.
Nasamsama mula sa dalawang suspek ang 25 transparent plastic sachet ng hinihinalang shabu, marked money, at isang sling bag.
Nauna rito, nakatanggap ng impormasyon si P/Lt. Jackson Aguyen, deputy ng Provincial Drug Enforcement Unit (PDEU) sa raket ng mga suspek kaya tumayong buyer si P/SSgt. Lyod Años at isinagawa ang anti-illegal drugs operation laban sa mga nadakip.
Kasalukuyan nang nakapiit ang dalawa sa detention cell at nakatakdang sampahan ng kasong paglabag sa Section 5 at 11 ng RA 9165 o Comprehensive Dangerous Drug Act of 2002. (EDWIN MORENO)
