HATAW! D'yaryo ng Bayan hatawtabloid.com
RECLUSION perpetua ang ipinataw na parusa batay sa hatol ng Quezon City Regional Trial Court sa walong miyembro miyembro ng pamilya Ampatuan.
Kabilang sina Datu Andal, Jr., at Zaldy na napatunayang “guilty beyond reasonable doubt” sa pagpaslang 58 katao (pero nawawala ang bangkay ng photojournalist na si Reynaldo Momay) kaugnay ng naganap na Ampatuan massacre noong 2009.
Bukod kina Andal, Jr., at Zaldy Ampatuan na dating gobernador ng Autonomous Region for Muslim Mindanao (ARMM), pinatawan rin ni Judge Jocelyn Solis-Reyes ng QC RTCh Branch 221 ng hatol na reclusion perpetua sina Anwar Ampatuan, Sr., Anwar “Ipi” Ampatuan Jr., Anwar Sajid “Ulo” Ampatuan, Manny Ampatuan, Mohades Ampatuan, at Misuari Ampatuan.
Ang ‘reclusion perpetua’ ay permanenteng pagkakakulong hanggang 40 taon na walang pardon o parole. Nasa 20 pang akusado ang hinatulang guilty.
Kasama rito sina P/Insp. Saudi Mokamad, PO1 Jonathan Engid, Abedin Alamada, alyas Kumander Bedi, Talembo “Tammy” Masukat, Theng Sali, alyas Abdullah Hamad Abdullakahar, Nasser Esmael, alyas Nasrudin Esmael, P/CInsp. Sukarno Dicay, P/Supt. Abusama Mundas Maguid, P/Supt. Bahnarin Kamaong, Tato Tampogao, Mohamad Datumanong, Taya Bangkulat, Salik Bangkulat, Thong Guiamano, Sonny Pindi, Armando Ambalgan, Kudza Masukat Uguia, Edres Kasan, Zacaria Akil, at Samaon Andatuan.
Sa 761-pahinang desisyon ni Judge Solis-Reyes, inatasan niya na bayaran ng milyon-milyong halaga ang pamilya ng bawat biktima ng masaker maliban sa photojournalist na si Reynaldo Momay, ang sinasabing ika-58 biktima, na hindi natagpuan ang bangkay.
Umabot sa 15 katao ang natagpuang guilty bilang ‘accessory’ sa krimen at hinatulan ng ‘prision correccional’ o hanggang 10 taon pagkakakulong.
Kabilang sina Michael P/Insp. Joy Macaraeg, PO3 Felix Enate, PO3 Abidudin Abdulgani, PO3 Rasid Anton, PO2 Hamad Nana, PO2 Saudi Pasutan, PO2 Saudiar Ulah, PO1 Esprielito Lejarso, PO1 Narkouk Mascud, PO1 Pia Kamidon, PO1 Esmael Guialal, PO1 Arnulfo Soriano, PO1 Herich Amaba, P/Supt Abdulgapor Abad, at Bong Andal.
After 10 years, nakamit ng mga naulilang pamilya ang katarungan sa pagpaslang sa kanilang mga kaanak.
Isa tayo sa mga kinabahan noon kung paano tatakbo ang pagdinig sa kaso, pero nang makita natin ang disposisyon ni Judge Solis nang hindi niya bitawan ang kaso, kinilala natin ang kanyang katapangan.
Sa kabila ng matinding impluwensiya ng mga Ampatuan noon, ginawa ang lahat ng paraan para mawala sila sa asunto, nanindigan si Judge Solis.
Alam natin, marami ang nagdiriwang ngayon, lalo ‘yung mga totoong umalalay sa mga kaanak ng mga biktima. ‘Yung mga genuine at ‘hindi nagtangka’ na sila ay ibenta (mabuti naman at hindi nagtagumpay ang mga nagtangkang ipagbili ang kanilang laban).
Ngayong ibiniyahe na sila sa Munti, umaasa tayo na patuloy na magbabantay ang lahat, dahil hindi pa tapos ang laban. Aapela pa ang mga Ampatuan.
At sana’y maging mahigpit si Bureau of Corrections (BuCor) chief, Gerald Bantag, para hindi magkaroon ng special treatment ang mga nahatulan sa Ampatuan massacre.
Let’s keep our fingers crossed.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
