HATAW! D'yaryo ng Bayan hatawtabloid.com
NAILIGTAS ang hindi bababa sa 49 pasahero ng isang bangkang de motor na lumubog sa karagatan ng lungsod ng Calbayog, sa lalawigan ng Samar noong Lunes ng umaga, 12 Agosto.
Nabatid na kaaalis ng M/B Miar Romces ng Calbayog City Port dakong 11:00 am nang makasalubong ang malalakas na hangin at alon na mas malaki pa sa bangka.
Patungo ang bangka sa bayan ng Tagapul-an, isang maliit na isla na nasa lalawigan din ng Samar.
Ayon kay Seaman Reni Costimiano ng Philippine Coast Guard sa Calbayog, lumubog ang bangka nang mapuno ito ng tubig mula sa mga along pinalakas pa ng habagat.
Dagdag ni Castimiano, nakakapit ang ibang pasahero sa nakataob na bangka habang ang iba ay nagpalutang-lutang na sa dagat nang dumating ang mga rescuer.
Nasugatan ang ilang pasahero ngunit walang naitalang namatay sa insidente.
