HATAW! D'yaryo ng Bayan hatawtabloid.com
ALL’S well that ends well.
Pagkatapos nang halos dalawang buwang gitgitan sa ‘estribo’ ng Speakership sa Kamara, diniinan na ni Pangulong Rodrigo Duterte ang ‘silinyador’ ng kanyang desisyon para arestohin ang namumuong ‘bangayan’ sa dalawang pinakamalapit sa puwesto — kina Taguig congressman Alan Peter Cayetano at Marinduque Rep. Lord Allan Jay Velasco.
Isang Solomonic decision ang ginawa ng Pangulo para payapain ang lahat ng grupo sa loob ng Kamara na may kanya-kanyang sinusuportahang kandidato sa pagiging Speaker.
Kapwa magiging Speaker ng Kamara sina Cayetano at Velasco, pero unang mauupo ang Alan na may single L sa loob ng 15 buwan at ang Allan na may double L ay mauupo sa huling 21 buwan.
Hindi lamang sina Cayetano at Velasco ang binigyan niya ng halaga sa nasabing desisyon, maging si Leyte Rep. Ferdinand Martin Romualdez ay iminumungkahi niyang maging Majority Floor Leader.
Sabi nga, tahimik ang lahat sa mungkahi ng Pangulo sa ginanap na pulong ng mga nasasangkot.
Sa ginawa ng Pangulo, lalong marami ang humanga sa kanyang pagdedesisyon.
Kumbaga kung hindi naging maingat sa kanyang pagdedesisyon ang Pangulo, mawawasak ang malapad niyang alyansa o koalisyon ng kanyang mga tagasuporta.
Lalo’t sabi nga, bawat isa sa kanila ay may malaking kontribusyon sa panalo ng Pangulo noong 2016 elections at sa nakaraang senatorial election.
Sabi ng Pangulo, isa ang kanyang layunin kung bakit pinalalapad niya ang kanyang alyansa — nais niyang tuparin ang mga pangako niya sa taong bayan noong siya ay kumandidato.
At ang mga nakapaloob sa kanyang alyansa ay pinaniniwalaan niyang makatutulong para matupad ang lahat ng kanyang pangako.
Kaya ngayon, umaasa tayong all’s well that ends well sa isyu ng Speakership sa Kamara.
Sulong sa SONA!
POGO WORKERS
NAGBABAYAD NA
NG P2-B WITHHOLDING
TAXES MONTHLY
ISA pang maituturing na tagumpay ng Duterte administration ang pinakahuling pakikipagpulong ni Finance Secretary Cesar Dominguez sa mga operator ng offshore gaming.
Sabi nga, parang naka-jackpot daw ang pamahalaan dahil nagkasundo ang dalawang panig na magbayad ng P2 bilyon kada buwan para sa withholding tax ng Chinese workers na nagpupunta sa bansa para magtrabaho sa Philippine offshore gaming operators o mas kilala sa tawag na Pogos.
Sa kanilang pag-uusap, sinabing mayroong 130,000 Chinese Pogo workers na nagtatrabaho sa 50 licensed gaming firms na may operasyon sa bansa.
Sa totoo lang, konserbatibo ang bilang na ito kompara sa rami ng Chinese nationals na nakikita natin sa kapaligiran.
Sa palagay natin, kailangan pang magtrabaho ng intelligence group para alamin ang mga ‘nakatagong’ offshore gaming na baka mas malaki pa ang kinikita kaysa doon sa mga nagdeklarang legal sila.
Hindi lamang sa batas ng pagbabayad ng buwis dapat sumunod ang Pogos, kailangan din nilang tupdin ang mga regulasyon sa membership dues ng Social Security System at Pag-IBIG Fund.
Kung hindi tayo nagkakamali, malaki ang tinatanggap na suweldo ng mga Pogo workers, konserbatibo ang sinasabing P40,000 – P50,000 isang buwan na suweldo ng bawat isa.
Patuloy din ang pamumukadkad ng isang Kim Wong sa industriyang ito. Katunayan, ngayon pa lang ay inaabangan na ang kanyang operasyon sa isang isla sa Cavite, na sinasabing magiging pinakamalaking Pogo sa bansa.
Bantayan natin kung malaki nga ang maitutulong nito sa ekonomiya ng bansa at para sa katuparan ng mga proyektong makatutulong sa sambayanang Filipino.
Kayod pa Finance department.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
