HATAW! D'yaryo ng Bayan hatawtabloid.com
DESMAYADO ang ilang residente ng District 3 sa Albay kasunod ng balitang isang malawakang vote-buying ang kasalukuyang ginagawa ng kampo ni Fernando Cabredo, kandidatong congressman.
Ang vote buying ay posibleng maparusahan ng pagkabilanggo ng isa hanggang anim na taon.
Isang barangay chairman ng nasabing distrito, ang nagsabing namahagi ang kampo ni Cabredo ng P500 bawat botante upang makakuha ng suporta sa 23 Mayo 2019 midterm elections.
“Inalok din ako ng kampo ni Cabredo ng malaking halaga. Hindi ko tinanggihan. Ang sagot ko lang sa kanila ay unahin ninyo ang mga tao sa aking nasasakupan,” pagbubunyag ng barangay chairman na nakiusap na huwag banggitin ang kanyang pangalan.
Magugunitang si Cabredo ay nahaharap sa isang disqualification case sa lokal na tanggapan ng Commission on Elections (Comelec) sa lalawigan ng Albay.
Batay sa reklamo, si Cabredo ay hindi kalipikadong tumakbo sa 3rd District ng Albay sapagkat siya’y bomoto noong Oktubre 2018 sa barangay election sa 1st District kaya hindi pa residente ng ikatlong distrito.
“Kailangan ideklara ng Comelec na disqualified si Cabredo sapagkat hindi siya residente ng District 3,” giit ng barangay chairman.
Ayon sa barangay chairman, pera-pera ang labanan sa Albay at dito kumakapit ang mahihirap at maraming walang hanapbuhay.
HATAW News Team
