Lim pinuri sa pagiging maginoo sa politika

UMANI ng papuri at palak­pakan ang nagbabalik na alkalde ng Maynila Alfredo S. Lim mula sa mga resi­dente at sup­por­ters mula sa sarili niyang kampo at ma­ging sa kam­po ng kanyang mga katung­gali sa politika nang mag­pakita ng pagka­maginoo sa pamamagitan ng pag­papahinto sa kanyang motorcade upang batiin at kamayan ang mga nasa­bing kandidato.

Sa kanyang motorcade sa G. Tuazon sa Sampaloc kahapon, nasalubong ng float ni Lim ang mga float ng mga kandidatong konse­hal mula sa tiket ng kan­yang katunggali na kasa­lukuyang alkalde Erap Estrada.

Pinahinto ni Lim ang kanyang float at inilabas ang kanyang katawan at braso upang  isa-isa niyang batiin, makamayan at sabihan ng ‘good luck’ ang mga nasabing kandidato, kasama na ang anak mis­mo ni Estrada na kandi­dato rin.

Bilang ganti ay naki­pag­­kamay din ang mga nasa­bing kandidato at nagpasa­lamat kay Lim habang ang kanilang mga kasamang supporters ay nagsipag­kaway din kay Lim, na marami ang nag ‘L’ sign at humihingi pa ng t-shirts at tarpaulins.

Nang makita ang ginawa ni Lim, nagpa­lakpakan at naghiyawan ang mga residente na nakapila sa kalsada na daraan ang float ni Lim kasabay ng paulit-ulit na pagsigaw ng “Mayor Lim! Mayor Lim!”

Ani Lim, siya ay na­gulat at natuwa sa reak­siyon sa kanya hindi la­mang ng mga kandidato kundi maging ng mga supporters nila.

Dagdag niya, ang bu­hay umano ay hindi nata­tapos sa politika lamang at wala umano siyang nakiki­tang dahilan upang maging personal o ‘di pansinin o tingnan nang masama ang mga kandidato na lumala­ban sa tiket ng kanyang mga kalaban sa politika.

“Kung saan sila masa­ya, doon sila. Inirerespeto ko ang kagustuhan ng ba­wat tao. Para sa akin, isang araw lang ang poli­tika at ‘yan ay sa araw lang ng halalan. Maski ‘yung mis­mong mga kala­ban ko talaga sa pagka-alkalde, kaka­mayan  ko rin kapag nakita ko,” pahayag ni Lim.

Para umano kay Lim, hindi niya kinakailangang gumamit ng maruming uri ng kampanya o pamomo­litika dahil siya ay tuma­takbo bitbit ang kanyang track record, gaya ng pagpapatayo ng City College of Manila (ngayon ay Universidad de Manila) na nagbibigay ng libreng edukasyon sa kolehiyo; pagpapatayo ng lima sa anim na city hospitals – isa kada distrito —  na nagbi­bigay ng libreng hospital care, treatment at mga gamot;  485 daycare centers, 97 karagdagang bagong buildings para sa elementary at high school, 59 barangay health centers, at 12 lying-in clinics o paanakan gayondin ang 130 kalsada na ipina­ayos o ipina-upgrade sa ilalim ng kanyang admi­nistrasyon.