Hubad na katawan ng ex-girlfriend ipo-post online… Ex-boyfriend arestado sa robbery extortion

KALABOSO ang 25-anyos lalaki at kasabwat nitong sound engineer sa kasong ‘robbery extortion’ sa 18-anyos ex-girlfriend, para hindi umano kuma­lat ang hubad na kata­wan sa San Juan City.

Kinilala ni EPD-director C/Supt. Bernabe Balba, ang mga nadakip na sina John Paul Salaño, 25 anyos, at umano’y kasabwat na si Joseph Roque, nasa hustong gulang, sound engineer kapwa ng naturang lungsod.

Dakong 1:00 hang­gang 3:30 ng hapon ikina­sa ng San Juan PNP ang entrapment operation matapos magkasundo ang suspek at biktima na magbibigay ng kuwarta sa harapan ng Salapan Elem. School sa Salapan San Juan City.

Aktong inabot ng suspek at kasabwat ang P2,000 cash, nang ares­tohin sa kasong paglabag sa anti-voyeurism act at robbery extortion.

Ayon sa awtoridad, tinakot umano nina Sa­laño at Roque ang babae na ipo-post ang mga hubad na larawan ka­pag hindi nagbigay ng pera.

Kung papayag ang biktima, agad umano nilang ide-delete ang kopya ng mga larawan.

Dito humingi ng tu­long sa mga awtoridad ang biktima at nagkasa ng entrapment operation laban sa dalawa.

Nakapiit na sa deten­tion cell ng pulisya ang mga suspek at nakatak­dang sampahan ng rekla­mong paglabag sa anti-voyeurism act at robbery extortion.