HATAW! D'yaryo ng Bayan hatawtabloid.com
MUKHANG hindi na ‘magkandaugaga’ ang Land Transportation Franchising and Regulatory Board (LTFRB) para makapag-operate ang Parañaque Integrated Terminal Exchange (PITX).
Noong una, ang pagkaunawa natin, ang PTIX ay nilikha para ang lahat ng provincial buses ay doon na lamang magte-terminal.
Pero hindi naman ganoon ang nangyari, dahil ‘yung mga kilala at malalaking kompanya ng transportasyon ay hindi napapasok ng LTFRB sa PTIX.
Ang rason ng nasabing malalaking transportation companies, hindi na sasakay ang mga pasahero patungong south Luzon na nasanay na sa terminal sa Maynila at sa Pasay City.
Sabi pa ng LTFRB, baka ang PTIX na raw ang lulutas sa isyu ng illegal terminals. Pero hindi nangyari at nanatili ang mga bus terminal sa Maynila, Quezon City at Pasay City.
Nagkaroon pa nga ng isyu at tsismis na may pinaboran ang boss ng Department of Transportation (DOTr) kaya nananatili sa Metro Manila ang terminal ng malalaking kompanya ng bus.
In short, nilangaw ang PTIX at kahit ang mga pasahero ay hindi pumupunta roon dahil hanggang 9:00 pm lang ang operation.
Wattafak!
Ano ‘yan bus terminal sa malayong probinsiya na limitado ang operasyon?!
At dahil palpak, sablay at hindi nangyari ang inaasahan ng kung sino mang ‘henyo’ sa likod ng PTIX, nagbubukas sila ngayon ng 20 bagong ruta na ang end route ay sa PTIX.
Hindi lang isang uri ng public utility vehicle (PUV) ang pinag-a-apply ngayon ng LTFRB para sa bagong prankisa para sa PTIX .
Batay sa LTFRB Memorandum Circular 2019-005 na inisyu nitong Miyerkoles, 23 Enero, bukas sila sa 10 public utililty buses, 2 UV Express o Class 3 public utility jeepneys, 8 Class 2 PUJs.
Ang mga interesadong operators aypinag-a-apply nila sa mga sumusunod na ruta: PUB PITX – Ternate, Cavite (30 units); PITX – Alfonso/Mendez, Cavite (28 units); PITX – Palapala/Dasmariñas, Cavite (30 units); PITX – Silang, Cavite (38 units); PITX – Tagaytay City, Cavite (38 units); PITX – Cavite City, Cavite (15 units); PITX – Indang, Cavite (35 units); PITX – Manggahan, General Trias, Cavite (35 units); PITX – Lancaster New City, Cavite (15 units); PITX – Nasugbu, Batangas via Ternate (20 units); UV Express Van or Class 3 PUJ PITX – Alabang, Muntinlupa (33 units); PITX – Tanza, Cavite (38 units) Class 2 PUJ; PITX – Bayan Luma, Imus, Cavite (50 units); PITX – Alabang, Muntinlupa (33 units) PITX – Tanza, Cavite (38 units); PITX – Bicutan, Parañaque via East Service Road (20 units); PITX – Bicutan, Parañaque via West Service Road (20 units); PITX – Sucat, Parañaque via Sucat Avenue (33 units); PITX – Blumentritt, Manila (55 units); PITX – Bacoor, Cavite (28 units).
Sa bawat ruta ay isa lamang ang pagbibigyang applicant pero kinakailangan na may kakayahan silang magbigay nang sapat na sasakyan para sa modernization plan ng DOTr.
At siyempre roon lang nila ibibigay ‘yan sa may kakayahang mag-comply na sumunod sa guidelines na itinakda ng public utility vehicle (PUV) modernization program ng pamahalaan.
Sa ilalim ng modernization plan, ang pinapayagan ay PUVs na less than 15 years ang existence. Kailangan umano ay environment-friendly at may safety features. Kailangan din na Euro 4 engines o mas mataas pa ang sasakyan.
At marami pang ibang rekesitos.
Sa madaling sabi mga suki, ang PTIX, hangga’t walang gumagamit bilang transportation bay and terminal ay magiging isang ‘white elephant.’
Tsk tsk tsk…
Ilang bilyong piso nga ang ginastos para maitayo ang PTIX?!
Paging DOTr!
PIRMA NG PANGULO
SA INTEGRATED
NATIONAL CANCER
CONTROL PROGRAM
HINIHINTAY
NAKALULUNGKOT man, dahil napaka-reactive ng ahensiya ng pamahalaan sa paglikha ng mga programang nakatuon sa kalusugan ng mamamayan ay gusto pa rin nating magpasalamat kahit paano lalo na kung malalagdaan na ng Pangulo ang Integrated National Cancer Control Program.
Sa kasalukuyan, cancer ang ikalawa sa may pinakamalaking bilang na dahilan ng pagkamatay ng mga Filipino. Una rito ang cardiovascular diseases.
Sabi nga, kapag tinamaan ng cancer mauubos ang lahat ng pundar. E paano kung pobre ‘yung tinamaan?!
Kaya ang batas daw na lalagdaan, ‘yan daw ang aalalay sa mga nagkakasakit ng kanser.
Sabi ng mga henyo sa kalusugan gaya ni Linus Pauling, “You can trace every sickness, every ailments, every disease, through a mineral deficiency.”
Kung susundan ng mga awtoridad sa kalusugan sa ating pamahalaan ang sinabing ito ni Pauling, dapat na ang ahensiyang nangangalaga sa kalusugan ng mamamayan ay dapat mag-isip kung paano magiging mahusay ang kalusugan ng mga Filipino.
Hindi gaya ngayon, na nagtatayo o lumilikha ng medical centers para sa mga maysakit — hindi para turuan ang mamamayan kung paano maging malusog.
Dahil sa ganitong sistemang umiiral, ang kaisipan tuloy ng mga Pinoy, pupunta lang sila sa doktor kung maysakit at sasailalim sa iba’t ibang uri ng laboratory test dahil kailangan na.
Hindi ba kayang gawin ng gobyerno na kahit walang nararamdamang masama sa kanyang katawan ay dapat sumailalim sa mandatory annual check-up upang masubaybayana ng kanilang kalusugan?!
Ang tanging nakagagawa niyan ay malalaking kompanya lamang, e paano ‘yung mga mamamayan na walang trabaho o mga babae nangangalaga ng kanilang tahanan?!
Hindi lamang mga maysakit ang dapat inaalagaan ang kalusugan dapat ganoon din ang bawat mamamayan kahit walang sakit. Nararapat lang na magkaroon ng karapatan ang bawat mamamayan na matiyak na alam nilang wala silang mabigat na karamdaman.
Dapat din maipamulat ng pamahalaan sa bawat mamamayan na ang pagmamantina ng mabuting kalusugan ay hindi sa pamamagitan ng mga gamot mula sa big pharmaceutical companies.
Maraming paraan na makatutulong para maging mabuti at maayos ang kalusugan ng bawat mamamayan gamit ang kabang yaman ng bayan. Hindi ‘yung lalabas lang ang pondo kapag maysakit at lupaypay na ang mamamayan — at parang pulubing namamalimos sa mga ahensiya ng pamahalaan.
Sana ang batas na lalagdaan ng Pangulo para sa Integrated National Cancer Control Program ay maging simula ng maayos na trato sa kalusugan ng bawat mamamayang Filipino.
Isa tayo sa umaasang darating ang panahon na ito.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
