HATAW! D'yaryo ng Bayan hatawtabloid.com
SUGATAN ang dalawang konsehal ng Subic, Zambales makaraan pagbabarilin ng hindi kilalang mga suspek sa highway nitong Lunes ng gabi, ayon sa ulat ng pulisya kahapon.
Ang mga biktimang sina Sangguniang Bayan members Roberto Delgado at Elizaldy Garcia, ay lulan ng Toyota Fortuner nang pagbabarilin ng mga suspek na sakay ng pulang sasakyan sa national highway ng kalapit na bayan ng San Narciso, ayon sa mga imbestigador.
Mabilis na tumakas ang mga suspek patungo sa hilaga makaraan ang pamamaril sa Brgy. Siminublan, dagdag ng pulisya, binigyang-diin ang impormasyon mula sa isang testigo.
Si Delgado na sugatan sa pag-atake, ay patuloy na inoobserbahan ang kalagayan, habang si Garcia ay stable na ang kondisyon.
Kaugnay nito, nag-alok si Subic Mayor Jay Khonghun ng P300,000 para sa impormasyon na makatutulong sa pagdakip sa mga suspek.
Hindi pa nababatid ng mga imbestigador ang posibleng motibo sa pag-atake.
