Med rep pinatay sa saksak (Nobyo kausap sa mobile phone)

CAINTA, Rizal – PATAY ang isang lady medical represen­tantive sa kaniyang bahay sa bayang ito sa sampung beses na saksak ng hindi kilalang suspek habang kausap umano ang kaniyang nobyo sa telepono.

Kinilala ang biktimang si Maria Kathrina Nakpil, 25 anyos.

Ayon sa kasintahan, galing siya sa isang coffee shop sa Marcos Highway nitong Biyernes at kausap sa telepono ang biktima nang marinig na tila may umaatake kay Nakpil, ayon sa pulisya.

Bumalik umano sa Cainta ang lalaki upang tiyaking ligtas si Nakpil, ngunit nakita niyang duguan at nakahandusay ang biktima nang silipin mula sa bintana ng bahay.

May tatlong persons of interest sa pananaksak, ayon sa hepe ng Cainta police na si Supt. Pablito Naganag.

Kinompirma ni Supt. Naganag na walang forced entry sa crime scene.

Habang sinabi ng mga kaa­nak na walang kaaway si Nakpil.

“‘Pag may nang-aaway diyan kasi, ‘di ‘yan lumalaban. Napakabait ng kapatid ko po. Di ‘yan nananakit o kahit na ano. Nagsasabi ‘yan sa ‘kin kung mayroon siyang problema,” sabi ng kapatid niyang si Maria Louella.