MABOLO, Cebu – Patay ang isang Korean national makaraan barilin sa labas ng inuupahan niyang silid sa isang motel sa lungsod na ito, noong Linggo ng gabi.
Binaril ng hindi kilalang suspek ang negosyanteng si Young Ho Lee sa pasilyo habang may tatlo pang suspek na nagsilbing lookout, ayon kay Mabolo police deputy chief, S/Insp. Jane Lito Marquez.
Wala nang buhay ang biktima nang abutan ng mga awtoridad.
“Hindi pa natin ma-establish talaga ang mga suspek kasi paiba-iba ang pahayag ng mga witness… Iimbestigahan pa natin, ano ba talaga ang anggulo nito,” ani Marquez.
Kabilang sa mga iniimbestigahan ang mga kawani ng motel na walang CCTV camera, dagdag ng pulis.
Nakikipag-ugnayan pa aniya ang mga imbestigador sa Korean Consulate para mabusisi ang background ng biktimang isang linggo nang nananatili sa motel bago ang krimen.
