HATAW! D'yaryo ng Bayan hatawtabloid.com
KUNG kailan going smooth na ang buhay ni Mona (Jodi Sta. Maria) pagkatapos ng pagdadalamhati niya sa pagkawala ng Tagpuan dahil kasama niya ang magulang ay at saka naman siya muling mapapasok sa gulo base sa tumatakbong kuwento ng seryeng Sana Dalawa Ang Puso sa ABS-CBN bago mag-It’s Showtime.
Nalaman ni Mr. Supapi (Leo Martinez) kung saan na nakatira si Mona dahil pinasundan niya sa tauhan ang tatay ng dalaga na si Ramon Bulalayao (Edgar Mortiz) na galing sa sabungan.
Nauna na rito ay nakasagupa na nina Mona at Leo Tabayoyong (Robin Padilla) ang tauhan ni Mr. Supapi nang magkita sila sa sabungan at hindi pa ipinagtapat ng una ang tunay na dahilan kung bakit siya hinahabol, sabi lang niya may malaki siyang utang. Hindi niya binanggit na kinuha nito ang clutch bag ng sabungero na naglalaman ng mga diamante.
At ang mga diamanteng ito ay napunta naman kay nanay Lena (Alma Moreno) niya na nakuha sa gamit ng asawang si Ramon na inakalang mga Swarovski na puwedeng gamitin sa pananahi.
Bumalik naman sa pagiging agent si Leo para alamin kung bakit hinahabol ng sindikato si Mona at kung ano ang kinalaman niya rito na hindi naman sinasabi sa asawang si Liza (Jodi).
Ano naman ang kaugnayan ni Sandra Tan (Irma Adlawan) sa ama ni Lisa na si Juancho Laureano (Christopher de Leon) dahil nang magkita sila sa opisina para dalawin ang anak ay nagkatitigan sila na hindi napansin ng asawa ni Leo.
Anyway, hindi pa rin okay sina Mona at Martin (Richard Yap) dahil akala ng huli ay galit pa rin sa kanya ang dalaga.
Abangan ang Sana Dalawa Ang Puso dahil ano kaya ang mararamdaman ni Leo kapag nalaman niyang may kinuhang bagay si Mona kay Mr. Supapi na hindi ipinaalam sa kanya.
ni REGGEE BONOAN
