Albularyo tiklo sa fetus at baril

RODRIGUEZ, Rizal – Isang albularyo ang nakompiskahan ng mga pulis ng bangkay ng isang 7-buwan gulang na fetus at ilang baril sa kanyang bahay sa bayang ito, kahapon ng umaga.

Ayon sa ulat ng pulisya, sinalakay ng mga operatiba ang bahay ng suspek na si Randy Picardal, 37, dahil sa mga ulat na nagtatago siya ng ilegal na baril, ayon kay Chief Supt. Guillermo Eleazar, hepe ng Calabarzon police.

Agad aniya nilang nakompiska ang isang .38 kalibreng, sumpak at sari-saring bala.

Ngunit sa gitna ng paghahalughog, tumambad ang fetus na nasa plastic bag gayondin ang dalawang sako ng adult diaper na may dugo, forceps, at halamang “Makabuhay” na ginagamit umanong pampalaglag.

Ayon sa mga kapitbahay, marami umanong babae, ang iba ay estudyante, na nagpupunta sa bahay ng suspek.

(ED MORENO)