HATAW! D'yaryo ng Bayan hatawtabloid.com
KAHIT na sinabi ni Pangulong Rodrigo “Digong” Duterte na simpleng State of the Nation Address (SONA) lang ang gusto niya at ayaw niya ng magarbo, lumutang pa rin ang ilang mambabatas at kanilang mga kabiyak suot ang mga mamahaling Mindanao Tapestry lalo na ang T’nalak.
Sa mga nagdaang administrasyon kasi, parang may fashion show kapag SONA.
Pabonggahan, mula ulo hanggang paa. Bonggang gown at terno, at luxury bags and shoes pati kotse bonggang rin!
Parang akala mo OSCAR o iba pang awards night o kasalan ang pupuntahan.
Kahit noong unang SONA pa lamang ni tatay Digong e mahigpit na niyang ipinag-utos na ayaw niya ng pabonggahan sa kanyang SONA.
Marami naman ang nakinig — noong unang SONA ‘yun.
Pero nitong Lunes, sa ikalawang SONA, mayroon talagang mga hindi makatiis.
Hindi makatiis pumorma at umawra?!
Kumbaga mayroong mga sumalisi gamit ang Mindanao tapestry para siyempre, kakaiba ang dating.
Mga de-kalibreng fashion designer ang gumawa ng kanilang very expensive na gown.
Ilan sa kanila si Tourism Secretary Wanda Teo, dating senador Nikki Coseteng, Presidential Spokesperson Salvador Panelo, Gov. Esmael “Toto” Mangudadatu, DPWH Secretary Mark Villar and wifey, Emmeline Aglipay-Villar, Rep. Elpidio Braganza Jr., and wifey Jennifer, Rep. Lucy Torres and daughter Julia, Lipa, Batangas Rep. Vilma Santos-Recto, senators Pia Cayetano and Loren Legarda at senatorial wife Heart Evangelista Escudero at ang simple pero rock na si Gov. Imee Marcos.
‘Yan naman daw ang hiling ng ilang kongresista at iba pang personalidad, ang magkaroon ng kaugnayan sa Mindanao ang kanilang kasuotan para sa SONA.
At ang designer diyan si Renee Salud.
Katunayan siya ang gumawa sa kasuotan nina Lipa, Batangas Rep. Vilma Santos at Tourism Sec. Wanda Teo.
Maging si Agriculture Undersecretary Berna Romulo ay natuwa sa kasuotan ng tribong Bagobo.
Anyway, sana sa susunod, lubusin na nila, fund-raising fashion show ng Mindanao tapestry na ang kikitain ay para makatulong sa rehabilitasyon ng Marawi City ganoon din sa unti-unting pagbabalik ng mga bakwit sa kanilang lugar at unti-unting muling pagbubuo ng kanilang buhay.
Ngayon sana ipakita ng mga fashionista na mambabatas na mayroon din silang compassion para sa mga kababayan natin at mga kapatid na Muslim na casualty ng labanan sa Mindanao.
Huwag naman puro pabonggahan at fashion pasiklab dapat may compassion rin kayo.
MIYEMBRO UMANO
NG ANTI-TERRORIST COUNCIL
NG MALACAÑANG
‘TERORISTA’ SA STA. ANA!?
Kahapon ng umaga pala, habang nag-aabang ng SONA ang sambayanan, isang insidente ang naganap sa Sta. Ana, Maynila na kung nalaman agad ni Pangulong Rodrigo “Digong” Duterte e tiyak na may kinalagyan na itong nagpapakilalang member ng anti-terrorist council umano ng Malacañang.
Hindi natin alam kung bakit nandito sa Maynila ang miyembro ng Anti-Terrorist Council ng Malacañang at bakit wala sa Marawi?!
Pero ibang klaseng anti-terrorist ang nagpapakilalang taga-Malacañang, anti-terror pero napakahusay mang-terror ng isang pobreng street sweeper.
Aba lintik, hindi sinasadyang nawisikan lang ng tubig na may sabon ng street sweeper ang kanyang kotseng Suzuki Ertiga may plakang AAY 9292, mantakin ninyong agad inasikan ‘yung street sweeper.
Dahil sa angas ni ungas, sinagot siya ng street sweeper na kung ayaw marumihan ang kotse niya ‘e huwag iparada sa Plaza Hugo.
E ‘yung Plaza Hugo kasi, mga suki, ginagamit ng mga residente riyan sa umaga para sa kanilang Zumba hindi para maging garahe mo ungas na anti-terrorist kuno.
Pero dahil sumagot ang street sweeper, aba, mantakin ninyong bumunot ng baril ala “FPJ’s Ang Probinsyano” saka tinutukan ‘yung pobreng mama?!
Sa takot ng street sweeper tumakbo hanggang sa presinto, pero hinabol pa rin siya saka pagdating doon, sasapakin pa siya, mabuti na lamang at nakailag.
Sonabagan!!!
Doon naman sa Presinto 6, habang nagpapa-blotter ‘yung street sweeper, panay ang kuda ni anti-terrorist kuno at ipinagmamalaki na siya ay taga-Malacañang.
Lu-lu mo! (Pahiram po tatay Digong)
Bakit hindi mo gamitin sa Marawi ‘yang angas mo, kamote ka!
Wala kang alam kundi kayan-kayanin ang isang street sweeper?!
Bakit hindi miyembro ng Maute/ISIS group ang i-terrorize mo?!
Doon po sa presinto, nalaman ng street sweeper na hindi lang pala siya ang biktima niyang nagpakilalang si Domingo Malacat Jr.
Ultimo pala ang barangay chairwoman nila ay tine-terrorize rin ng nagpapakilalang Malacañang boy.
Nananawagan po kami sa Malacañang kung mayroon man kayong Anti-Terrorist Council at kung mayroon kayong tao na nagngangalang Domingo Malacat Jr., e paki-inform lang naman po si Pangulong Tatay Digong at ang AFP na roon siya dalhin sa Marawi at itapat sa mga sniper.
Masyado po siyang matapang para sa barangay nila sa Sta. Ana, bigyan po natin siya ng katapat.
‘Yun lang po!
NAIA TERMINAL 2
FOR DOMESTIC
FLIGHT NA LANG!
SA susunod na taon daw ay nakatakda nang i-convert sa domestic terminal para sa Philippine Airlines at Cebu Pacific ang kabuuan ng Ninoy Aquino International Airport Terminal 2.
Ito ay para raw ma-decongest ang sobrang daming pasaherong pinaghalo sa international and domestic flights.
Sa totoo lang, tila maliit at kulang nga kung titingnan ang immigration counters ng nasabing terminal. Madalas ay makikitang nagsisiksikan sa haba ng pila ang mga pasahero sa bawat airline counters na nagdudulot ng inconvenience sa mga pasaherong umaalis at dumarating sa bansa.
Ayon sa Manila International Airport Authority (MIAA), sadya namang ginawa at idinisenyo ang naturang airport para maging domestic terminal lamang. And since biglang dumagsa ang bilang ng airlines sa ating bansa, nagdesisyon ang nasabing ahensiya na ilaan ang terminal 2 para para gawing domestic airport.
For sure, maaapektohan ang malaking bilang ng immigration personnel na naka-assign sa terminal na ito.
Malaking relief naman ito para sa pamunuan ng Immigration Ports Operations Division dahil siguradong mapupuno na ang Immigration counters ng T1 at T3 na naging problemang malaki noon ni POD Chief Marc Red Mariñas dahil sa biglaang resignation ng Immigration Officers na apektado sa pagkawala ng overtime pay.
Kasalukuyan na ring inuumpisahan ng MIAA ang pakikipag-usap sa pamunuan ng PAL at Cebu Pacific para sa ikadadali ng nasabing plano.
At kapag natuloy ito, paano na ang human trafficking raket nina alias “Boy Pisngi” at “Rico Mambo!?”
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
