HATAW! D'yaryo ng Bayan hatawtabloid.com
MALALA raw ang paglabag sa patakarang “nose-in, nose out” ng 10 bus terminals na ipinasasara ng Metropolitan Manila Development Authority (MMDA) sa Efipanio delos Santos Avenue (EDSA).
Tinukoy ng MMDA ang mga bus terminal ng DLTB Bus, Lucena Lines, Raymond Transportation, Saint Rafael Transport Lines, Our Lady of Salvacion Bus Line, JAM Liner, Superlines Transport, Victory Liner, Dimple Star Transport at Roro Bus Transport.
Maganda ang layuning ito ng MMDA. Lalo na riyan sa Pasay City na sandamamak ang mga kolorum na bus gaya ng BILLY BUS na may biyahe hanggang Samar.
Noon pa man ay pinupuna na natin ang mga bus terminal na ito na sinasakop ang mga kalsada sa kanilang operations.
Bukod pa nga riyan, nagiging kanlungan ang mga terminal na ‘yan ng mga kolorum na bus.
Pero kakaiba ‘yang mga ‘yan.
Sila pa ang matatapang kapag nagkakaroon ng insidente ng sagian at banggaan.
And take note walang asuntohan ‘yan, basagan lang ng side mirror o butasan lang ng gulong, amanos na!
Sonabagan!
Bilib tayo kung seryoso talaga ang MMDA na ipasara ang mga bus terminal na ‘yan sa EDSA.
Pero higit pa tayong bibilib sa MMDA kung maisasara nila at tuluyang mawawalis ang pinakamalaking illegal terminal sa Liwasang Bonifacio (Lawton).
Ang Liwasang Bonifacio ngayon ay hindi na isang liwasan o pasyalan ng mga tao.
Ito ngayon ay isang malaki at mabahong illegal terminal at kanlungan ng mga kolorum na van.
Ang ipinagtataka natin, parang may ‘tapa ojo’ ang MMDA dahil sa direksiyon lang sila ng EDSA nakatutok ng tingin.
MMDA Chairman, ret. Gen. Danilo Lim, Sir, baka hindi pa nakararating sa inyo ang ulat na may isang malaking illegal terminal sa Liwasang Bonifacio.
Kung walang nagrereport sa inyo na mga opisyal ng MMDA, puwes panahon na para imbestigahan ninyo ang mga taong dapat sana ay iniuulat sa inyo ang mga ganyang isyu.
Better yet, pakipasyalan po ninyo ang Liwasang Bonifacio, at doon baka maiyak kayo sa kalunos-lunos na sinapit ng monumento ni Gat Andres Bonifacio…
‘Yan ay dahil sa maliLIGAYAng operator ng illegal terminal diyan sa Liwasang Bonifacio!
AYOS KA TALAGA
TATAY DIGONG!
Sa lahat ng mga naging presidente, si Tatay Digong (Pangulong Rodrigo “Digong” Duterte) lang ang nakapagsabi at nakapag-utos sa lahat ng ahensiya ng pamahalaan na huwag ilagay ang kanyang retrato.
Ayon pa sa Pangulo, retrato ng mga tunay na bayani ang dapat ilagay.
Tumpak na tumpak po ‘yan, Mr. President!
Makikita mo kasi ang retrato ng commissioner, secretary at ng Pangulo sa isang opisina ng ahensiya ng gobyerno.
Akala mo nga ‘altar’ na sa dami ng retrato?!
Pero hindi nahihiyang magnakaw kahit sandamakmak ang mga retrato na nakasabit sa opisina n’ya!
Sabi nga ng Pangulo, marami sa mga inilalagay nilang retrato nasangkot na sa korupsiyon pero inilaladlad pa.
Iba naman sa ibang bansa. Gaya sa Taiwan, ang makikitang larawan sa mga paaralan at government agencies ay si Chang Kai Shek o si Sun Yat Sen.
Sa Thailand naman, ang kanilang Hari ang makikitang larawan sa mga institusyon ng pamahalaan.
At sa Cuba nga, mismong si Fidel Castro ay nagbilin na huwag gamitin ang kanyang pangalan sa alinmang institusyon o sa mga kalye bilang memorial.
Kadalasan ay retrato ng kanilang national hero ang makikita sa iba’t ibang bansa.
Ganyan sila karangal.
Hindi gaya rito sa ating bansa na ultimo pusa o tuta ng isang politiko, ipinapangalan sa kalye, sa eskinita, sa plaza na nilalagyan pa ng rebulto.
Bakit hindi ninyo ipangalan sa mga baradong pusali ‘yang mga pangalan ninyo?!
O kaya lahat ng tambakan ng basura, palitan ng mga pangalan ng mga politiko?!
O ‘di ba?!
Ngayong Pangulo na mismo ng bansa ang nag-uutos na huwag ilagay ang kanyang larawan, magsisunuran naman kaya ang mga politikong balak gawan ng kulto ang kanilang angkan?!
Abangan natin mga suki kung sino ang mga politikong pulpol na magtatanggal ng mga nakakalat o nagkakalat nilang mga karakas sa kanilang mga lugar at iba’t ibang ahensiya ng lokal na pamahalaan.
TITAN
AT MS UNIVERSAL
CLUB UNTOUCHABLE
SA PASAY CITY
SIR, tanong lang ho sa PNP Pasay at Mayor’s office. Bakit open ang prostitution sa Ms. Universal club at Titan club? Magaling ba silang maghatag ng tara?
+639187291 – – – –
MAY NAG-POSITIVE
SA DRUG TEST SA APD?
GOOD am sir, may mga nag-positive sa drug test sa amin sa airport police department pero naka-deploy pa sa mga terminal. Walang ikinaso ang legal ofc sa mga ungas. Dapat paimbestigahan ng mga positibo sa droga. Salamat po.
+63916833 – – – –
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
