Environmental degradation sa Boracay lulutasin ba ng congressional inquiry?

MATINDI na umano ang environmental degradation sa pamosong Boracay island na matatagpuan sa Kalibo, Panay island.

Ayon kay Samar representative Edgar Sarmiento, kailangan umanong magsagawa ng house inquiry sa nagaganap na unti-unting pagkawasak ng Boracay.

Sinisi niya ang pagkawasak na ito ng Boracay sa pagdayo ng maraming turista, dayuhan o lokal, at sa explosive population growth umano sa nasabing isla.

‘Yan ang nakatatawa sa mga opisyal ng pamahalaan at mga mambabatas natin dito sa Filipinas.

Paatras mag-isip at hindi pasulong?!

‘Yang pagdami ng dayuhan at paglaki ng populasyon ay normal na pangyayari sa isang lipunan.

Kaya naghahalal ng mga opisyal ng pamahalaan at mga mambabatas ang mga mamamayan, para may opisyal na mag-isip, magplano ng mga proyekto, bumuo ng mga programa, at magtakda ng mga patakaran na dapat umiral sa isang lipunan.

Kabilang sa dapat na maging batayan ng kanilang mga bubuuing programa ang bilang ng mamamayan at kung gaano ito kabilis dumami.

Ilan ang regular population, weekend population, peak season population at ilan ang populasyon na dapat maging prayoridad ng lokal na pamahalaan para sa social services.

Kung ikinatutuwa ng pamahalaan na ang Boracay ay tampok at pamoso sa buong mundo kaya dinarayo ng mga turista, dapat din isipin kung paano poproteksiyonan ang kalikasan at kapaligiran na tila sa isang paraiso lang matatagpuan.

Ibig sabihin, dapat laging abanse mag-isip ang lokal na pamahalaan lalo na’t mabilis lumaki ang bilang ng populasyon.

Kaya hindi puwedeng sisihin ang paglaki ng bilang ng mga turista o pagdami ng residente sa pagkasira ng Boracay.

Bakit hindi ‘yang malalaking developer at investor ang busisiin ni Congressman!?

Tingnan na lang natin ang kasaysayan ng Singapore.

Kung nakita ninyo ang Singapore kahit noong 1965 lang, hindi ninyo aakalain na uunlad sila sa kanilang kinalalagyan ngayon.

Dati, sa Malaysia lang sila umaasa at kumukuha ng maiinom na tubig.

Pero naisipan nilang ilagay sa bote (purified water) ang tubig mula sa Malaysia saka iniluwas pabalik sa mas mataas na halaga.

Noong araw, tila isang disyerto ang Singapore, pero nagawa nilang magtayo ng botanical garden, man-made tree at mantakin ninyo nagkaroon sila ng Tulips garden na dati ay sa malalamig na lugar gaya ng Holland lamang makikita?

Gaano na ba kalaki ang populasyon ngayon ng Singapore? Gaano karami ang dayuhan o turista? Ang migrant workers?

Dumumi ba ang Singapore at nasira ang kalikasan at kapaligiran?!

Hindi ba’t buhay na buhay at ang linis-linis ng Singapore?!

Sa ganang atin, illogical ang inihihirit ni congressman Sarmiento na house inquiry sa degradation ng Boracay.

Ang kinakailangan, magkaroon ng komprehensibong urban planning ang Boracay para mapanatiling malinis ang isla habang napapangalagaan ang likas na yaman.

Higit sa lahat, regulasyon at regularisasyon sa pagtatayo ng mga konkretong gusali.

Let’s face it, Boracay is a world class tourists destination.

Pakiusap po huwag na ninyong, gulantangin at guluhin ng mga house, house inquiry ninyo!

EX-PULIS MPD KINOKOPO
ANG 1602 SA MAYNILA!?

LUMALAWAK at umaalagwa ang mga latag ng ilegal na sugal o 1602 ng isang tinaguriang berdugong ex-Manila tulis ‘este Police sa lungsod ng Maynila na nasasakupan rin ng National Capital Region Police Office(NCRPO) ni RD General Oca Albayalde.

‘Yan ang positibong impormasyon na ipinarating sa atin ng bulabog boys sa MPD HQ at sa Manila City hall.

Kinilala ang ex-cop cum 1602 operator na si alias Tata MATANSERO A-Bad.

Kung dati ay video karera at bookies ng kabayo lang ang latag sa Sta. Mesa at Sampaloc area, iba na ngayon, dahil mas pinaigting at pinalalawak ni alias Tata Matansero ang mga butas ng kanyang bookies na dinagdagan pa ng STL cum tengwe, lotteng, bol-alai atbp.

Hanep ka bata!

Para palang slogan ng isang mall na “you got it all” ang 1602 operation ni alias tarantado Matansero sa Maynila?!

Magaling daw kasing mag-deliver ng intelihensiya si alias Matansero sa mga ‘kinauukulan’ sa MPD at city hall.

Ang siste, sa una lang pala magaling ang hinayupak, ayon sa mga beteranong pulis sa Maynila. Likas daw na tulisan ang mama dahil sa rami ng pinangakuan ng ganansiya ay lumobo at lumaki sa daang-libong utang sa mga obligasyon.

May ipinagmamalaki at pamatong malaking personalidad raw kasi si alias Tata Matansero sa kanyang illegal gambling operation sa Maynila.

Sonabagan!!!

May style bulok pa ang kumag na pababanatan sa konek niyang ilang taga-media ang mga kalaban na gambling lord para nga naman makopo ang 1602 sa isang area?!

Huwaw!

MPD DD Gen. Joel Coronel, ganyan ho ba katindi ngayon si Tata Matansero sa teritoryo ninyo?!

Ano nga ba ang accomplishments ni gambling lord Tata ‘Matansero’ Abad noong siya ay aktibo pa sa WPD?!

Nandidilat raw sa dami ng kakilalang notoryus na adik at kaibigang bigtime magbababoy ‘yan kaya sikat sa Tondo at Sampaloc, noon pa man…

Abangan!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap