Mag-ingat sa notoryus na basag kotse gang sa Roxas Blvd to MOA

PUMUTI na po ang buhok natin sa Metro Manila pero kahapon lang natin naranasan mabasagan ng kotse.

Opo, isang nakalulungkot na karanasan, nakapanghihilakbot lalo na kung ang mabibiktima nitong mga animal na ito ay walang ibang maaasahan kundi ang nasikwat nila.

Kamakalawa ng gabi, hindi lang po tayo complainant, sumama na rin tayo sa imbestigasyon at napatunayan natin marami nang nabibiktima ‘yang basag-kotse gang na ‘yan.

Simpleng-simple ang tirada ng mga animal, walang 3 minuto magagawa nilang basagin na walang ingay ang windshield para makuha nila ang valuable items sa loob ng sasakyan.

Masyadong malalakas ang loob nila dahil gabi kung tumira sila. Iikutin ang buong paligid, sisipatin ng magka-tandem kung ano-ano o sino-sino ang mga taong nasa paligid.

Kapag nakita nilang hindi mainit ang sitwasyon, saka sila titira ng bibiktimahin.

At ‘yan ay sa pamamagitan ng tinatawag na ceramic shards mula sa spark plug.

Ihahagis lang nila ito sa windshield, aalis sandali para hindi sila mahalata. Maya-maya babalik at walang kahirap-hirap na itutulak ang windshield.

Buong-buong babagsak ang windshield, walang ingay na makatatawag ng pansin sa iba. Saka ipapasok ang kalahati ng katawan para sikwatin kung ano ang masisikwat.

Malaking isda rin ang nabingwit ng basag-kotse gang.

Mahilab-hilab ‘ika nga bukod pa sa prehuwisyong kailangang magpalit o magbago ng mga importanteng dokumento.

I must say, it was a lesson.

Kuwidaw lang sa mga sumikwat, may patibong diyan bukod sa sandamakmak na kamalasang aabutin ninyo.

Kapag nagkamali kayo, isang bitag lang kayong lahat!

‘Yung cash na nakuha ninyo, gamitin sana ninyo sa mabuting bagay para makapagbagong-buhay na kayo!

Huwag ninyong susubukang balikan ang modus operandi ninyo dahil tiyak na darating ang araw na pagsisisihan ninyo o ng pamilya ninyo ‘yan.

Sabi nga e, tapat-tapat lang ‘yan…

By the way, nagpapasalamat tayo kay Pasay City chief of police (COP) S/Supt. Dionisio Bartolome, kay Station Investigation and Detective Management Branch (SIDM) head, C/Insp. Rolando Baula sa mabilis na aksiyon. Umaasa tayo na magwawakas na ang modus operandi ng sindikatong ‘yan.

Nagpapasalamat din tayo sa mga katoto nating sina Amor Virata at Armie Rico at Pasay Councilor Moti Arceo na mabilis na umalalay sa inyong lingkod matapos mabiktima ng basag-kotse gang.

Inuulit lang natin ang mensahe — mag-ingat sa basag-kotse gang na nagyayaot diyan sa Roxas Boulevard hanggang sa Mall of Asia (MOA) — huwag kayo mag-iiwan ng valuables sa loob ng kotse kung walang bantay.

At sa mga pusakal na basag-kotse gang — KAIINGAT kayo!

LABOR ATTACHE SA MIDDLE EAST
BINALAAN NI LABOR SECRETARY BELLO
VS KAPABAYAAN SA OFWs

SA pagkakataong ito, may ultimatum na si Labor Secretary Silvestre Bello laban sa mga Labor Attache sa Middle East na walang ginagawa para sa kapakanan ng overseas Filipino workers (OFWs).

Nito lang nakaraang Marso, pinauwi ni Secretary Bello ang mga labor attaché na sina Ophelia Almenario ng Abu Dhabi; David Des Dicang ng Qatar; Rodolfo Gabasan ng Israel; Nasser Mustafa ng Oman; at Nasser Munder ng Taichung.

Pinauwi sila para sa isang consultation meeting at para ipaalala sa kanila na mayroon silang tungkulin at obligasyon na alalayan ang mga kababayan nating OFWs, lalo na ‘yung mga nasusuong sa hindi magandang sitwasyon.

Sa kasalukuyang sitwasyon sa Middle East, inaalala ni Secretary Bello ang mga Pinoy na maiipit sa kaguluhang nagaganap ngayon.

Hindi natin alam kung ano na ang nangyari sa mga labor attaché dahil mukhang hindi tayo updated kung ano ba ang nangyayari sa Middle East lalo ngayong may banta ang Saudi Arabia laban sa Qatar dahil nagkakandili umano ng terorista gaya ng ISIS.

Sa ganang atin, wasto lamang na paalalahanan sila ni Labor Secretary Bello dahil malaki ang ipinasusuweldo sa kanila ng pamahalaan.

Libre bahay, sasakyan, health, education, gastos sa recreation, leisure and entertainment etc.

Talagang buhay-hari at buhay-reyna sila kapag naririyan sa Middle East.

Pero kapag nagigipit ang mga OFW, hindi sila mahagilap. Aba kung walang silbi sa OFWs ‘yang mga labor attaché, pauwiin nang tuluyan ang mga ‘yan!

Baka hindi nila alam na OFWs ang nagpapasuweldo sa kanila…

‘Di ba, Secretary Bello?!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap