Beauty enhancement clinics dapat nang pakialaman ng DoH!

ISA na namang biktima ng beauty enhancement clinic or cosmetic surgery ang hindi nakatitiyak kung magkakaroon ng katarungan ang hindi inaasahang pagkamatay matapos sumailalim sa tatlong beauty enhancement operation sa dalawang doktor sa Mandaluyong City nitong Sabado ng hapon hanggang Linggo ng madaling araw.

Isa itong trahedya para sa pamilya ng 29-anyos na si Shiryl Saturnino.

Inaasahan nilang pagkatapos ng operasyon ay matutuwa sila sa kasiyahang ibabahagi sa kanila ni Shiryl dahil nadagdagan pa ang alindog na kanyang tinataglay.

Sabi nga ng mga kamag-anak ni Shiryl, likas na maganda ang masipag na negosyante, pero dahil sadya siyang vanidosa kaya ginusto niyang mas maging kaaya-aya pa kaysa rati.

Pero ‘yun nga, pagkatapos ng tatlong cosmetic surgery na liposuction, breast and butt surgery nag-expire si Shiryl nang hindi namamalayan ng dalawang doktor na sina Dr. Jose Jovito Mendiola at Dr. Samuel Eric Yapjuangco ng The Icon Clinic.

Tumawag pa raw ng ambulansiya, siyempre naghintay pa, saka itinakbo sa Makati Medical Center pero dead on arrival ang biktima.

Shock to the max talaga tayo sa balitang ito bagamat hindi lang ito ang na-encounter natin na ganitong kaso.

Dati na nating isinulat ang kaso ng misis ng isang kaibigan natin na sumailalim sa liposuction procedure sa clinic ni Dra. Vicky Belo sa Timog QC pero nag-expire rin.

Kasunod nito ang iba’t ibang insidente sa iba pang cosmetic surgeon na mga sumagwa ang itsura matapos sumailalim sa iba’t ibang beauty enhancement or cosmetic surgery.

Mga nagreklamo at naghain ng kaso pero hindi natin nabalitaan kung nakamit ba ang katarungan.

Sa mga ganitong insidente sino ang awtoridad na dapat managot?

Siyempre walang aako. Kasi ang katuwiran nila, private clinic ang mga nasasangkot.

Pero hindi ba naiisip ng Department of Health (Paging Secretary Paulyn Jean Rossel-Ubial) na mayroon silang pananagutan diyan?!

Panahon na upang maisipan nila na huwag payagang magsagawa ng mga cosmetic surgery sa mga clinic at suriing mabuti kung ano ang health implications nito.

Kailangan magpatupad nang mahigpit na patakaran ang DOH sa mga cosmetic surgery clinics at limitahan ang pagsasagawa ng nasabing surgical operations.

Hindi ba mas nararapat at ligtas kung sa loob mismo ng operating room sa hospital ginagawa ang procedure na gaya nito!?

Secretary Ubial puwede bang isa ito sa maging legacy ng Duterte administration?!

Umpisahan na, now na!

SECRETARY AL CUSI
NAGKALOOB NG ARTWORK
PARA SA DUTERTE’S KITCHEN

Goose bumps ang naramdaman ko nang mabasa ko ang isang maliit na photo caption tungkol kay Energy Secretary Al Cusi.

Ipinagkaloob ni Secretary Cusi ang painting (collector’s item) na regalo sa kanya ng kaibi-gang Japanese aritist na si Keisuke Teshima, na kilala sa kanyang One-Stroke Dragon technique, para sa proyektong Duterte’s Kitchen feeding program.

Pero imbes na cash ang ibigay ng mga bidder, nangako silang magkakalob ng lugaw, gamit at iba pang pangangailangan para sa Duterte’s Kitchen.

Goose bumps, kasi, ngayon lang tayo nakaranig nang ganito sa mga government official.

Karamihan ng mga alam nating naitatalaga ng isang presidente sa posisyon, ang unang iniisip kung paano magge-generate ng ‘sariling pondo’ papasok sa kanilang bulsa.

Si Secretary Cusi, napaka-priceless ng kanyang kontribusyon sa Duterte’s Kitchen feeding program.

Kung tutuusin puwede namang ipanghi-ngi na lang niya ang ipagkakaloob niyang donasyon. Tiyak magkakandarapa pa ang suppliers at bidders sa mga proyekto ng Department of Energy (DOE) para sa ganitong proyekto, makalapit lang sa kalingkingan ng Pangulo.

Pero hindi ginawa ni Secretary Al ‘yun, sa halip ipinagkaloob niya ang isang priceless possession.

Isang magandang halimbawa para sa iba pang government official.

Sana lahat ng government officials ay mayroong ganitong uri ng pag-iisip. Kung ganyan sila, tiyak babalik ang dating mataas na pagti-ngin ng mamamayan sa pamahalaan.

Keep up the good work Secretary Al ‘Pon-sing’ Cusi, kudos!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
Jerry Yap