Gen. Ronald “Bato” Dela Rosa dapat makinig kay Senator Panfilo “Ping” Lacson

KUNG gusto ni Philippine National Police (PNP) chief, Director General Ronald “Bato” dela Rosa na magkaroon siya ng “legacy” dapat niyang sundin ang payo ni dating PNP chief, at ngayon ay senador Panfilo Lacson.

Napaka-constructive ng mga puna at payo ni Senator Ping kay DG Bato. Bawasan ang pakikipagsosyalan at huwag masyadong mahilig sa concert at libreng tiket para sa mga palabas at boksing sa ibang bansa.

May hirit kasi si DG Bato na hindi naman na mabubuhay si Jee Ick-joo, ang South Korean businessman na piñata ng mga pulis, kahit hindi siya manood ng concert ni Bryan Adams.

Lalo tuloy siyang naupakan.

May punto si Senator Ping, puwedeng samantalahin ng mga tiwaling pulis ang kahinaan ni DG Bato. Ang pagiging lax sa mga dinadaluhang event na hindi naman nakatutulong sa pagsusulong ng peace and order.

Para tuloy ipinakikita ni DG Bato na ‘yung mga hindi niya nagagawa noon ay sabik na sabik siyang gawin ngayon.

Hay naku, DG Bato, laglag na laglag ka riyan sa mga diskarte mo.

Anyway, sabi nga ninyo, idol ninyo si Senator Ping dahil former boss ninyo siya at gusto ninyong tularan ang mabubuting bagay na nagawa niya noong chief PNP pa siya.

‘Yan ang pinakamagandang gawin ninyo DG Bato. Maging huwaran kayong chief PNP.

Pagkatapos ng term ninyo, saka ninyo gawin ang mga bagay na hindi ninyo nagawa noong araw.

Aprub ka ba riyan, DG Bato?!

BARANGAY NA MAY
ILLEGAL TERMINAL
SASAMPAHAN NG KASO
SA OMBUDSMAN

Naaalala pa kaya ng mga kinauukulan ang Republic Act 9146 o ang Land Transportation and Traffic Code?

Sa Section 52 Article V ng code na ito, ipinagbabawal ang “Driving or parking on sidewalk. —No person shall drive or park a motor vehicle upon or along any sidewalk, path or alley not intended for vehicular traffic or parking.”

Sa biglang pagdami ng sasakyan sa buong bansa lalo sa urban areas sa Luzon, Visayas at Mindanao, nakikita natin sa araw-araw ang naghambalang na sasakyan sa kalye, eskinita at ilang bakanteng lote. Pero ang higit na nakaiinis, ‘yung mga kalsada na ginagastuan nang milyon-milyon ng gobyerno pero ginagawa lang parking area ng mahihilig sa sasakyan pero walang parking area.

Ganoon din ang mga plaza at liwasan na ginagastusan at inaalagaan para pagandahin pero ginagawang paradahan ng mga kolorum na van, UV express at provincial buses.

Kung magiging seryoso si Metropolitan Manila Development Authority (MMDA) chairman Tim Orbos, ang pagpapatupad ng Land Transportation and Traffic Code o Republic Act 9146 ay malaking tulong para maibsan ang buhol-buhol na trapiko at para lumuwag din ang kalsada.

Pero kailangan muna ng alternatibong solusyon kung saan mapupunta ang mga sasakyan na tatanggalin sa kalsada.

May ilan tayong suhestiyon lang, Chairman Tim. Ang Divisoria o Binondo area ay puwedeng gawing trike o padyak city.

Ibig sabihin walang bibiyaheng mga jeep, private cars at iba pang kauri.

Puwedeng magtayo ng parking building o collapsible parking area gaya sa Greenhills.

Kikita na ang barangay, kikita pa ang trike at padyak. Hindi na rin makapag-o-overprice dahil sila na lang nga ang mode of transportation sa Divisoria at Binondo.

Ang Intramuros naman ay puwedeng gawing caleza city, e-jeep o e-trike, o trike at pedicab mismo. At ganoon din ang sistema, kailangan magkaroon ng parking area para sa parking ng mga sasakyan.

Hindi gaya ngayon, na ang kumikita ay ilang indibiduwal at tiwaling barangay officials na nagmamantina ng illegal parking.

Alam nating hindi ganoon kadali ang pagpapatupad niyan, pero kung uumpisahan puwedeng magkaroon ng katuparan sa hinaharap.

Pero hindi rin matagumpay na maipapatupad ‘yan kung hindi magiging matapang si Chairman Tim Orbos para ireklamo ang mga barangay officials na pinagkakakitaan ang mga pampublikong lugar na dapat sana ay lugar pasyalan ng ating mga kababayan.

Chairman Tim, baka gusto mong sampolan ang napakalaking plaza sa Ermita na ginagawang illegal terminal ng mga colorum na van, UV express at provincial buses?!

Marami nang sumalok ng kuwarta Riyan!

Panahon na siguro para tuldukan.

Wanna try, Chairman Tim?

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap