Hamon kay Gen. Bato ni Speaker Bebot Alvarez ipinasa kay Tatay Digs

HINAMON ni House Speaker Pantaleon “Bebot” Alvarez si PNP chief, Gen. Ronald “Bato” dela Rosa na magbitiw sa kanyang tungkulin dahil pawang kahihiyan umano ang napapala ng Pangulo sa pulisya.

Kaugnay ito ng pinakahuling pangyayari ng pagkakabuyangyang sa kidnap-slay sa Koreanong si Jee Ick Joo na ang perpetrator ay pawang mga pulis.

Binabansagan ito ngayong “Tokhang-for-ransom” dahil, ginamit umano ng mga sangkot na pulis ang Operation Tokhang o anti-illegal drugs campaign o drug war ng Pangulo.

Mantakin ninyong sa loob mismo ng Camp Crame, pinatay sa sakal ni SPO3 Ricky Sta. Isabel ang Koreano?!

Isang malaking insulto nga naman ‘yan na ang mga ‘kaaway’ ay nasa tungki lang ng ilong ni Gen. Bato pero hindi man lang niya natutunugan.

Kumbaga, nasa loob na mismo ng kanyang tahanan pero dahil sa labis na tiwala ay hindi man lang niya napag-isipan na gagawaan siya ng kataksilan ng mga pulis na kanyang pinagkakatiwalaan.

Sa madaling sabi, under hot water ngayon si Chief PNP.

Pero dahil, malinis ang kanyang konsensiya, sinabi ni Gen. Bato, kapag ang Pangulo na ang nag-utos sa kanya na magbitiw, saka siya magbibitiw.

For the meantime, itutuloy ni Gen. Bato ang kampanya laban sa droga, hanggang dumating ang panahon na naubos na ang mga pusher.

Unsolicited advice lang Gen. Bato, huwag po kayong magpa-kengkoy sa publiko.

Maging seryoso po kayo. Mantakin ninyong kumanta at sumayaw pa yata kayo sa isang concert ‘e hindi naman kayo performer?

E ano ang magiging pagtingin sa inyo ng publiko?

Ipagpatuloy ninyo ang taktika at estratehiyang “winning the heart and mind of the people” kung gusto ninyong magwagi sa giyera kontra droga.

‘Yun lang po, Gen, Bato!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap