HATAW! D'yaryo ng Bayan hatawtabloid.com
APAT ang patay makaraan maka-enkuwentro ng mga tauhan ng PNP-Cainta ang mga miyembro ng Highway Boys, grupo ng gun-for-hire na sangkot din sa ilegal na droga at robbery holdup sa Brgy. San Andres, Cainta, Rizal kamakalawa.
Sa ulat ni Supt. Marlon G. Nilo, chief of police, nang matunton nila ang kinaroroonan ng grupo ay sinalakay nila ang lugar ngunit lumaban ang mga suspek na nagresulta sa pagkamatay ng apat sa kanila at naaresto ang 15 iba pa.
Nakompiska ng mga pulis mula sa mga suspek ang iba’t ibang kalibre ng baril.
Ayon sa mga pulis, kasalukuyan nilang hinahanap ang mass grave na pinaglilibingan ng grupo sa mga biktimang kanilang napatay.
Iniimbestigahan din ng pulisya ang impormasyon na inilalagay ng grupo sa drum ang kanilang napapatay at sinesemento saka itinatapon sa ilog.
(ED MORENO)
