6 drug suspect patay, 3 kritikal sa vigilante

ANIM hinihinalang sangkot sa droga ang patay habang tatlo ang kritikal makaraan pagbabarilin ng hindi nakilalang mga suspek na pinaniniwalaang mga miyembro ng vigilante group sa magkakahiwalay na lugar sa Caloocan City.

Sa ulat ng pulisya, dakong 1:00 am kahapon, nasa loob ng kanyang bahay sa115 Bouganivillea St., Brgy. 166 si Joel Torcelino, 36, nang biglang pasukin ng tatlong armadong lalaki at siya ay pinagbabaril na kanyang ikinamatay.

Dakong 7:30 am, pinagbabaril ng riding-in-tandem suspects ang mga naglalaro ng cara y cruz sa Phase 4B, Package 8, Brgy. 176, Bagong Silang na nagresulta sa pagkamatay nina Edward Asne, 18; Julius Parolan, 19, at Bely Joe Batingal, 20-anyos.

Inoobserbahan sa FEU hospital si Benencio Francisco, 45, habang sina Boby Sarmiento, 25, at Ernesto Asne, 30, ay ginagamot sa East Avenue Hospital.

Sa Brgy. 168, Deparo, naglalakad si Sonny Gallegas, 34, sa Natividad Village dakong 5:50 pm nang pagbabarilin ng dalawang lalaking lulan ng motorsiklo na kanyang ikinamatay.

Nauna rito, 5:15 pm nang pagbabarilin ng dalawang hindi kilalang suspek na sakay ng motorsiklo sa loob ng kanyang bahay si Gerald Magat, 27, ng Block 11, Lot 36, Brgy. 185, Malaria na kanyang ikinamatay.

( ROMMEL SALES )