HATAW! D'yaryo ng Bayan hatawtabloid.com
PATAY ang limang hinihinalang drug user at holdaper nang lumaban sa mga pulis makaraan holdapin at i-gapos ang isang babae, sa inilatag na dragnet operation ng mga awtoridad sa Jala-jala, Rizal kahapon ng umaga.
Ayon kay Chief Inspector Joseph D. Macatangay, chief of police ng Jala-Jala PNP, dakong 6:30 am nang holdapin ng mga suspek ang biktimang si Flora Oruga, 49, ng Upper Sambungan, Brgy. Bagumbong, iginapos at piniringan saka kinulimbat ang kanyang laptop, alahas at pera.
Pagkaraan, tumakas ang mga suspek sakay ng puting Toyota Vios (AAJ-8436) at isang Mio motorsiklo na kulay pula at itim patungo sa kabayanan.
Ngunit agad nakahingi ng saklolo sa himpilan ng pulisya ang biktima at sa tulong ng barangay chairman ay inilatag ang “dragnet operation” na nagresulta sa pagkakahuli sa limang suspek ngunit nakatakas ang dalawa nilang kasama na lulan ng motorsiklo.
Gayonman, habang lulan ang mga suspek ng mobile car, sinasabing inagaw ng isa sa kanila ang Glock 9mm ni PO2 James Cuenco at itinutok sa mga pulis ngunit hindi pumutok.
Bunsod nito, pinaputukan ni PO1 Rowel Sabangan ang mga biktima na kanilang ikinamatay.
( ED MORENO )
