HATAW! D'yaryo ng Bayan hatawtabloid.com
LIMA katao ang patay, kabilang ang isang babae, nang ratratin ng anim armadong lalaki at tinangay ang P200,000 cash ng isa sa mga biktima sa Brgy. Addition Hills, Mandaluyong City kamakalawa ng gabi.
Ayon sa ulat ng pulisya, kinilala ang mga napatay na hinihinalang may kinalaman sa droga, na sina Manuel Evangelista, 37; Jennifer Discargar, 31; John Paolo Toboro, 24; Edmar Velarde at Catalino Algueles.
Napag-alaman, dakong 9:35 pm nang pasukin ng hindi nakilalang mga armado ang bahay ni Roger Evangelista, kapatid ng isa sa biktima, pinalabas ang anak, saka pinagbabaril ang lima, sa Blk 37, EXRT Lot-01, Addition Hills sa lungsod.
Ayon sa anak ni Roger, habang nagsasagawa ng pot session ang mga biktima, pumasok ang mga suspek saka sila pinagbabaril.
Nakuha sa lugar ng krimen ng mga tauhan ng Scene of Crime Operatives (SOCO) ang ilang shabu paraphernalia, ilang sachet ng shabu at P2,000.0.
Samantala, ayon sa ina ng biktimang si Jennifer, na si Cecilia Discargar, may P200,000 cash na hawak ang anak na pinagbentahan ng bahay nila.
Inamin ng ina ni Jennifer na drug user ang anak at gumagamit din ng droga ang kapatid.
Teorya ng pulisya, isang drug den ang bahay ni Roger Evangelista.
ni ED MORENO
