HATAW! D'yaryo ng Bayan hatawtabloid.com
PINAGHAHANDA ang lahat sa pagpasok ng bagong bagyo na tatawaging “Lawin” dahil mas malakas ito kompara sa bagyong Karen.
Inaasahang magiging supertyphoon ang naturang bagyo na papasok sa Philippine area of responsibility (PAR) dakong hapon nitong Lunes kung hindi magbabago ang direksyon at bilis nito.
Base sa weather update ng Pagasa, namataan ang sama ng panahon sa 1,265 kilometro sa silangan ng Visayas.
Taglay nito ang lakas ng hangin na aabot sa 150 kilometro kada oras malapit sa gitna at may pagbugso na hanggang 185 kilometro kada oras.
Patuloy ang pagtahak nito sa direksyong kanluran hilagang kanluran sa bilis na 22 kilometro kada oras.
NDRRMC TODO-HANDA
SA PAGPASOK NI LAWIN
HINDI pa man natatapos ang assestment ng National Disaster Risk Reduction and Management Council (NDRRMC) sa pagtama ng bagyong Karen, todo na ang paghahanda ng ahensiya sa paparating na bagyong may international name na Haima o tatawaging bagyong Lawin pagpasok sa teritoryo ng Filipinas.
Ayon kay NDRRMC spokesperson Mina Marasigan, kahapon o ngayong araw ay magsasagawa sila ng pre-disaster risk assestment meeting para sa papasok na bagyo.
Sinabi ni Marasigan, posibleng tamaan ulit ng bagong bagyo ang mga probinsiya sa northern Luzon na tinamaan ng bagyong Karen.
Dahil dito, kailangan nilang abisohan ang local government units (LGUs) sa naturang mga probinsiya para maiwasan ang ano mang trahedya.
