Raket ng ‘bata’ ni Erap pinaiimbestigahan sa NBI

SOBRANG kapal at labnaw din naman talaga ang utak ng ilang konsuhol ‘este konsehal na nagsasabing kaalyado raw sila ni Mayor Erap Estrada.

Para lang magkapitsa, pati si Erap handa nilang sagasaan at ilubog.

Umpisahan natin sa simula.

May mga naglabasang balita kamakailan lang tungkol sa pangingikil ng isang grupo ng mga kasalukuyan at ‘ex’ na konsehal sa mga night club, bar, KTV at iba pa, na humihingi ang grupo ng mga corrupt ng P30,000 hanggang P60,000 buwanang payola.

Kapag ‘di nagbigay, harassment ang katapat hanggang maipasara.

Bukod pa riyan ang libreng inom, lamon, babae at pati parking.

Halos 100 porsiyento na positive ang isinulat ni Ms. Itchie Cabayan sa kanyang kolum sa People’s Journal tungkol sa masamang bisyo nitong mga alagad ni Yorme Erap.

Anim umano ang miyembro ng nasabing grupo. Ang apat ay kasalukuyang konsehal at dalawa ay extortion ‘este ex-councilor.

Ang lider ay ‘yung isa sa dalawang ex-councilor na nangangalandakang siya ngayon ang pinakamatigas sa City Hall.

‘Pag sinabi raw niya, parang sinabi na rin ni Erap. May letter ‘D’ at ‘A’ sa pangalan niya at wala raw pinagkakaabalahan kundi maghanap ng pitsa gamit ang pangalan ni Erap at gawan ng kaaway sa kabubulong na si ganito at si ganyan ay ‘bata ni Lim.’

Anyway, dahil sa naglabasang balita na buong konseho ang nagiging masama sa paningin ng publiko, nag-request na sa National Bureau of Investigation (NBI) si Konsehal Bernie Ang na maimbestigahan ang isyu at kilalanin ang mga walanghiyang konsehal para hindi lahat nadadamay.

Para mabigyan ng dahilan at legalidad na ituloy nila ang kanilang ‘pagbwisita’ sa mga hinuhuthutang establishment, gumawa ng resolusyon ang mga hinayupak na kailangan daw inspeksiyonin ng konseho at i-regulate ang operasyon ng mga establishment sa Maynila dahil sa malaganap na ilegal na sugal at prostitusyon sa lungsod.

Wattafak?!

Ibig sabihin, inaamin nilang inutil ang administrasyon ni Erap sa mga nasabing problema kaya kailangan pa nilang makialam?

Mas magaling pa sila kay Erap, ganon?!

Hindi pa ‘yan. Alinsunod daw sa kampanya ng national government ang kanilang hakbang.

Sonabagan!!!

Ibig bang sabihin, kailangan nang pumasok ng national government sa Maynila para lang matapos ang problema ng prostitusyon at illegal gambling dahil nga hindi kaya ni Erap?

Sa mga nasabing konsehal, isa lang ang maliwanag. Hindi na bale sa kanila na magmukhang tanga at palpak ang kaalyado nilang si Erap maituloy lang ang kanilang pangingikil.

‘Pag ganyan rin lang ang mga klase ng kaalyado, hindi na kailangan ng kaaway.

Anong say ninyo Yorme Erap, diyan sa mga nagpapakilalang ‘bata’ mo?!

‘KOMUNISTA’ SA GABINETE
NI PANGULONG DUTERTE
PINAGSISINTIRAN NG ECOP

Mukhang hindi consistent ang chair emeritus ng Employers Confederation of the Philippines (ECOP) na si Donald Dee. Dapat daw ‘bunutin’ ni Pangulong Rodrigo “Digong” Duterte sa kanyang Gabinete ang mga komunista na nagpapakalat at nang-iimpluwensiya umano ng kanilang ideolohiya imbes magtrabaho gaya ng paglikha ng maraming trabaho.

Inihayag ito ni Dee, matapos lumakas nag panawagan na wakasan ang talamak na contractualization o ENDO system na kinatigan naman ng Pangulo.

Hindi ba’t nagbanta pa ang Pangulo na ipasasara ang mga kompanyang hindi titigil sa pagpapatupad ng ENDO system sa pagpapa-empleyo?

Ang sabi, ang pinariringgan daw ni Dee ay sina Labor Secretary Silvestre “Bebot” Bello at Undesrecretary Joel Maglunsod, dating Anakpawis party-list representative.

‘Yung P125 across-the-board wage increase daw ay may implikasyon sa kalagayan ng mga negosyante.

Ang kuwentada ni Dee, 7.7 milyon daw ang bilang ng wage earners kaya kung ipatutupad ang P125 across-the-board wage increase, nanganghulugan umano ‘yan ng halos P1 bilyong dagdag sa gastos ng mga negosyante sa bawat araw.

Magiging triple rin daw ang inflation hanggang 6.5 percent. Maliwanag umano na hindi man lang inisip ng ‘kaliwa’ kung ano ang magiging epekto sa buhay ng tricycle driver at iba pang self-employed (as in jobless madalas, at may job paminsan-minsan?) kung tataas ang inflation.

Bintang ni Dee, hindi ipinalalaganap ng leftist group ang patakaran ng Pangulo sa paglikha ng mga trabaho kundi ang sarili nilang pilosopiya.

Abangan nga natin ‘yan sa 100 days report ng Pangulo lalo sa report ng DOLE.

Pero ang hindi natin maintindihan, kontra nang kontra si Dee pero ‘yung grupo daw nila ay sila mismo ang nagpupulis.

Ang hindi raw tumupad sa patakaran ng Pangulo na wakasan ang ENDO system sa pag-i-empleyo ay kanilang tinatanggal sa kanilang grupo sa ECOP Management Association of the Philippines (MAP).

‘E ‘yun naman pala, puwede naman palang gawin na huwag nang ipatupad ang ENDO system, e bakit hinintay pa ng ECOP at MAP na amging presidente ang isang gaya ni Digong bago nila itigil ang labor practice na alam nilang mali?!

Hindi kaya galit lang si Dee sa leftist group dahil kinatigan ng Pangulo ang kanilang panawagan?!

Ano sa palagay ninyo mga suki?!

BANGKAY NG DISTRESS OFW
SA SAUDI ARABIA
ANO NA ANG NANGYARI?!

Halos dalawang linggo nang naglalakad ang aming lay-out artist na si Lani Cunanan para sa pagpapauwi ng bangkay ng kanyang asawang si Rodel Cunanan.

Halos limang taon nang nagtatrabaho si Rodel sa Saudi Arabia, pero nitong Setyembre 26, isang masamang balita ang natanggap ni Lani.

Inatake sa puso ang kanyang asawa habang nasa trabaho.

Agad nagpunta si Lani sa Department of Foreign Affairs (DFA) at sa OWWA para alamin ang proseso ng pagpapauwi sa bangkay ng kanyang asawa.

Mahirap ilarawan ang kalagayan ni Lani. Isang ina na nagtatrabaho, may domestic task, nag-aasikaso ng dalawang anak at ngayon ay nadagdagan pa dahil kailangan niyang makapunta sa iba’t ibang tanggapan ng ating pamahalaan para maiuwi ang bangkay ng asawa.

Sa pagitan ng mga nasabing tungkulin at gawain, hindi malaman ni Lani kung paano niya maisisingit ang kanyang pagdadalamhati at pagluluksa.

Hindi naman puwedeng umiyak nang umiyak lang siya.

Sa huling pagtawag niya sa DFA, sinigawan pa siya ng taong kausap niya, na isa pa namang babae.

Sonabagan!!!

Kahapon, nagkaroon nang pagkakataon si Lani na makausap si Labor Secretary Bebot Bello.

Pansamantalang nakasilip ng pag-asa si Lani.

At sa konting pag-asang nasilip niya, umaasa kami at si Lani na hindi maglalaon ay maiuuwi na ang bangkay ng kanyang asawang si Rodel.

Ngayon pa lang, nagpapaabot na kami ng pasasalamat kay Secretary Bebot Bello.

Salamat po.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN – Jerry Yap