7 patay sa ratrat sa Caloocan

PITO katao ang patay, kabilang ang live-in partner, sa magkakahiwalay na insidente ng pamamaril sa Caloocan City kamakalawa ng gabi at kahapon ng madaling-araw.

Ayon kay Caloocan City Police deputy for administration, Supt. Ferdinand del Rosario, dakong 12:37 am kahapon, nasa loob ng bahay sa 2130 Saint Benedict St., Admin Site, Brgy. 186, Tala ang live-in partners na sina Rosario Antonell, alyas Dale at Jandale Avestro, alyas Jackie, at residente ng Block 74, Lot 9, Lagro, Novaliches, Quezon City, nang pasukin ng hindi nakilalang armadong mga suspek saka sila pinagbabaril.

Dakong 9:30 pm kamakalawa, pinagbabaril ng hindi nakilalang dalawang suspek ang biktimang si Ariel Armada, 36, construction worker, sa Phase 8A, Package 8, Blk. 91, Brgy. 176, Bagong Silang.

Dakong 11:00 pm kamakalawa, pinasok ng apat armadong lalaking lulan ng motorsiklo ang bahay ni Edmon Allovers, 38, tricycle driver, sa Phase 7B, Package 10, Block 10, Excess Lot, Brgy. 177 at siya ay pinagbabaril.

Habang natagpuan ang bangkay nina Patrick Egan, welder, at isang hindi nakilalang lalaki dakong 2:10 am kahapon Aurora St. at Sampaloc St., boundary ng Brgy. 177.

Sa Brgy. 27, dakong 9:50 pm kamakalawa, binaril ng hindi nakilalang suspek si Hector Maninang, 49, construction worker, sa Laon-Laan kanto ng Dimasalang St., Maypajo.

( ROMMEL SALES )