HATAW! D'yaryo ng Bayan hatawtabloid.com
UMABOT sa P38 milyong cash deposits ang napunta sa bank accounts ng dalawang kamag-anak ni Ronnie Dayan, ang sinasabing driver, lover at bagman ni Sen. Leila de Lima.
Base sa bank documents na hawak ng Department of Justice (DoJ), milyon-milyong cash ang pumasok sa account nina Hannah Mae Dayan at Marco Palisoc, ang anak at pinsan ni Dayan.
Ang impormasyon ay lumabas sa fact-finding investigation ng DoJ sa illegal drug operations sa New Bilibid Prison (NBP) noong kalihim pa ng DoJ si De Lima.
Sa mga dokumento na hawak ng DoJ, naideposito sa account ni Dayan ang P24 milyon sa pamamagitan ng apat na cash deposits, kabilang dito ang P3 milyon noong Pebrero 7, 2014; P9 milyon noong Pebrero 21, 2014; P6 milyon noong Marso 14, 2014 at P6 milyon noong Marso 28, 2014.
Habang ang account ni Palisoc ay nakatanggap ng P14,304,000 sa dalawang cash deposits, P9,600,000 ang naideposito rito noong Setyembre 16, 2014 at P4,704,000 noong Oktubre 23, 2014.
Sinabi ng isang source na ipinadala na ng DoJ ang bank records sa Anti-Money Laundering Council (AMLC) para sa verification.
Una nang ibinunyag ni Justice Secretary Vitaliano Aguirre II, nakakuha na ang mga imbestigador ng bank deposit slips ng ilang staff ni De Lima at mga taong may kaugnayan sa senadora na aabot sa P88 milyon.
Sa iba pang bank records, ang cash deposits ay napunta sa dating staff ni De Lima na sina Jonathan Caranto (P24 milyon), Bogs Obuyes (P24 milyon) at Marrel Obuyes (P2.2 milyon).
DAYAN PAHAHARAPIN SA KAMARA
PADADALHAN na ng subpoena ng House Committee on Justice ngayong linggo ang dating driver ni Senadora Leila de Lima na si Ronnie Dayan.
Ito ay para obligahin si Dayan na sumipot sa pagpapatuloy ng imbestigasyon ng Kamara sa paglaganap ng ilegal na droga sa loob ng New Bilibid Prison (NBP).
( JETHRO SINO CRUZ )
