HATAW! D'yaryo ng Bayan hatawtabloid.com
BONGGA si Jennylyn Mercado dahil si Coco Martin pala ang next leading man niya sa pelikulang pang-Metro Manila Film Festival ng Starcinema ngayong taon.
Akala namin ay ang tambalang Daniel Padilla at Vice Ganda ang entry ng Starcinema ngayong taon na si direk Wenn Deramas mismo ang nagsabi sa amin noong nabubuhay pa siya.
At dahil wala na si direk Wenn, wala na rin ba sa plano ang DJ at Vice tandem ng Starcinema? Baka naman kasi pinag-iisipan pa kung sino ang direktor dito.
Balik-usapin sa Coco at Jennylyn tandem ay nakagugulat ito dahil akalain mo ang bilis kaagad ng follow-up ng aktres sa Starcinema pagkatapos ng Just The 3 of Us nila ni John Lloyd Cruz.
Hindi naman din lugi ang Starcinema at ABS-CBN kay Jennylyn dahil pawang hit ang mga pelikula niya mula sa English Only Please, #Walang Forever na pawang kasama sa MMFF at itong latest movie nila ni John Lloyd na Just The 3 of Us na kumita ng mahigit P180-M sa Pilipinas at umabot naman sa almost $5-M sa ibang bansa.
Bukod dito, muling nanumbalik ang init ni Lloydie sa pelikula dahil hindi naman kaila sa lahat na ilang pelikula niya ang hindi maganda ang kinita noong nakaraang taon.
At siyempre, hindi rin naman matatawaran ang record ni Coco na primetime king dahil sa FPJ’s Ang Probinsyano dahil laging lampas sa 40 ang ratings at ang pelikula nila ni Vice ang highest grosser sa kasaysayan ng Pelikulang Filipino na Beauty and The Bestie na ipinalabas noong nakaraang taon at siyempre mula sa direksiyon ni Deramas.
Hmm, sino kaya kina direk Cathy Garcia Molina at Mae Cruz-Alviar ang magdidirehe? O baka naman may i-import ding direktor ang Starcinema mula sa ibang TV network?
FACT SHEET – Reggee Bonoan
