Pinay dedbol sa bundol ng SUV sa Italy

BINAWIAN ng buhay ang isang Filipina domestic helper makaraang mabundol ng Sports Utility Vehicle (SUV) sa Milan, Italy nitong Sabado.

Para sa agarang repatriation ng labi ng Filipina worker, inaayos na ng Overseas Workers Welfare Administration (OWWA) ang kailangang mga dokumento para rito.

Kinilala ang overseas Filipino worker (OFW) na si Myrna Reyes, isang kasambahay, nabagok ang ulo sa insidente.

Base sa ulat, galing sa trabaho ang biktma at habang naglalakad pauwi sa kanyang tirahan nang biglang mahagip ng SUV.

Sa tindi nang pagkakabangga, tumilapon ang biktima at nabagok ang ulo.

Agad isinugod ng Milan authorities sa pagamutan si Reyes na nagawa pang sabihin kung kanino dapat ipaalam ang nangyari sa kanya.

Binawian ng buhay ang biktima dahil sa internal bleeding makalipas ang isang oras.

Siniguro ng OWWA na tatanggap ng cash incentives at livelihood assistance ang mister ng biktima.