Pulis, 2 pa arestado sa droga

TIYAK na ang pagkasibak ni PO1 Orlando Danao Jr., 34-anyos, kasamang nadakip sa buy-bust operation ng mga tauhan ng Marikina City Police, kapag naupo na si President-elect Rodrigo Duterte.

Ayon kay Senior Supt. Vincent Salanoga Jr., si PO1 Danao ay nakatalaga sa Quezon City Police District (QCPD) Station 4.

Kabilang din sa nadakip sa operasyon sina Eddie Protacio, 53, at Joyce-Ann Combis, 23, kapwa nakatira sa Balubad St., Brgy. Nangka, Marikina City.

Dakong 4:50 p.m. kamakalawa nang arestohin nina PO3 Jose Francisco at PO2 Procopio Fabillar ng Station-Anti-Illegal Drugs Special Operation Task Group (SAID-SOTG) ang mga suspek sa lugar.

Nakompiska mula sa mga suspek ang isang kalibre .45 pistol, shabu, at drug paraphernalia.

Nadakip ang mga suspek makalipas ang ilang linggong surveillance operation kaugnay ng pagtutulak ng droga sa lugar.