AFP routine patrols sa border ng bansa tiniyak

AMINADO ang pamunuan ng Armed Forces of the Philippines na hindi nila nababantayan 24/7 ang borders ng bansa dahil sa napakalawak nito gayon man sinisiguro ng militar na mayroon silang ginagawang routinary patrols sa bahagi ng southern Philippines na tinagurian din backdoors ng bansa.

Ayon kay AFP spokesperson BGen. Restituto Padilla, bukod sa routine patrols ng pamahalaan mayroon din silang joint border exercises sa pagitan ng mga bansang Malaysia at Indonesia na taunang aktibidad.

Layon nito na mapaigting pa ang relasyon at interoperability ng Filipinas sa dalawang bansa.

Sinabi ni Padilla, mahigpit ang ginagawang patrolya ng militar sa border lalo na sa bahagi ng Tawi-Tawi dahil sa mga ulat na namamayagpag ang smuggling activities sa backdoor ng bansa.

Inihayag ni Padilla, hindi malayong may nakalulusot na mga intruder o sino mang mga determinadong indibidwal lalo na kapag may alam sila sa lugar kung kaya’t ginagawa ng mga awtoridad ang lahat para mabantayan ang napakalawak na border ng bansa.

Pagbibigay-diin ni Padilla, kapwa may mga kaukulang security measures na ipinatutupad ang Filipinas maging ang dalawang neighboring countries na Malaysia at Indonesia kaugnay sa pagbabantay sa border.