Indonesia nag-sorry sa ‘di makontrol na haze

HUMINGI ng paumanhin si Indonesian Vice President Jusuf Kalla sa perhuwisyong dulot ng haze mula sa forest fires sa kanilang bansa.

Ang naturang haze o usok ay bumalot sa Southeast Asia.

Si Kalla ang kinatawan sa Asia-Pacific Economic Cooperation (APEC) 2015 ni Indonesian Pres. Joko Widodo dahil hindi  nakarating ang pangulo para sa ilang mahalagang appointment.

Sa kanyang pagharap sa APEC-CEO Summit, nag-sorry rin si Kalla sa mga karatig na Singapore at Malaysia na higit  naapektohan ng haze.

Paliwanag ni Kalla, hirap makontrol ang haze bunsod ng hangin. Hindi kasi aniya kayang kontrolin ng tao ang hangin.

Ayon pa sa Indonesian official, malala lang ang haze ngayong taon dahil sa El Nino na mas mahaba ang dry season.

Inihayag ni Kalla, ngayong taon ay sisimulan ng Indonesia ang malaking proyekto ng ‘reforestation.’

Ito ang nakikitang solusyon ng Indonesia sa taunang problema sa haze kaya kailangan nila ng international cooperation.

Umaasa rin ang Indonesia na magiging tagumpay ang climate change conference sa Paris sa susunod na buwan para  makatulong sa problema.

Nabatid na maging sa ilang bahagi ng Filipinas ay umabot na rin ang haze mula sa Indonesia.