Cabanatuan truck ‘inagaw’ ng Palayan City at Kapitolyo (Politika sa NE umiinit na)

UMIINIT na ang politika sa Nueva Ecija matapos ‘kompiskahin’ ng Palayan City police at ng provincial government ang ten-wheeler truck na pag-aari ng Cabanatuan City.

Sa kasagsagan ng pananalasa ng bagyong Lando nagresponde ang engineering team ng Cabanatuan City sa utos ni mayor Jay Vergara sa bayan ng Gabaldon dahil naharangan ng mga batong inagos ng baha ang mga daanan.

Sa isang liham na ipinadala kay Vergara ng mga mamamayan ng Gabaldon, humingi sila ng tulong para tanggalin ang mga nakahambalang na bato at iba pang kalat na delikado sa kanilang kaligtasan at kabuhayan.

Tumugon ang local government pero sa kasagsagan ng clearing operation inaresto ang driver ng truck at kinompiska ang sasakyan na naghahakot ng mga bato.

Pinalaya ang driver na si Bernie Astrera matapos magpiyansa pero nakakabinbin pa rin ang truck sa opisina ng Provincial Environment and Natural Resources (PENRO) hanggang ngayon.

Matapos kasuhan ang Cabanatuan City ng ‘illegal transport of minerals’ ng mga tauhan ni Nueva Ecija Governor Aurelio Umali.

Tensiyonado ang sitwasyon dahil tumangging i-turn over ng PENRO ang sasakyan sa kabila ng pakiusap ng mga abogado ni Vergara.

Kinondena naman ng mga taga-Gabaldon ang pagpigil sa tulong na inihatid sa kanila ng Cabanatuan.

Matagal nang may alitan sa politika ang kampo ni Vergara at Umali.