Malaysian nat’l tiklo sa buy-bust sa Marikina

ARESTADO sa buy-bust operation ang isang 21-anyos Malaysian national at kanyang kasama sa operasyon ng Station Anti-Illegal Drugs Special Operation Task Group (SAIDSOTG) sa Marikina City kahapon.

Kinilala ni Senior Supt. Vincent Calanoga, hepe ng Marikina City Police, ang nadakip na si Thevan Elamlathir, 21, estudyante tubong 3060 Blk-G, Pangsapuri Seri Matahari, Kuala Lumpur Malaysia, at ang kanyang kasama na si Alvin Nacario y Amador, 30, naka-tira sa 342 Apitong St., Marikina Heights sa lungsod.

Ayon sa mga awtoridad, dakong 7 a.m. nang maaresto ang mga suspek sa anti-drug operation ng pulisya sa St. Marcellin Champagnat St., Marikina. Nakompiska-han ang dalawa ng apat na sachet ng shabu.

Nauna rito, dalawang linggong isinagawa ng mga awtoridad ang surveillance hinggil sa pagtutulak ng droga ng mga suspek sa lugar.

Nakapiit na ang mga suspek at nahaharap sa kasong paglabag sa R.A. 9165 o Dangerous Drugs Act of 2001.