Tautuaa, Rosario palpak ang unang laro sa TnT

NAGING very disappointing ang panimulang laro nina Moala Tautuaa at Troy Rosario para sa Talk N Text noong Biyernes nang hindi sila nakapamayagpag sa kanilang  sagupaan ng Alaska Milk.

Aba’y tinambakan ng Aces ang Tropang Texters, 114-98.  Si Rosario ay nakagawa ng apat na puntos samantalang si Tautuaa ay gumawa lang ng dalawang puntos sa pamamagitan ng isang slam dunk.

Napakalaking letdown iyon. Kasi nga’y malaki ang inaasahan sa kanila ng TNT. Sila ang top two picks ng nakaraang PBA Amateur Draft.

Si Tautua ay nakuha ng TNT buhat sa Blackwater sa pamamagitan ng isang trade na nakumpleto noon pang isang taon.  Sinasabing second coming siya ni Paul Asia Taulava na isa ring Fil-Tongan na gaya niya.

Pero siyempre. Bago pumanhik ng PBA ay wala pa rin namang kampeonatong napapanalunan si Tautuaa dahil nabigo siya sa ABL at sa PBA D-League kung saan nakapaglaro siya para  sa Cagayan Valley Rising Suns at Cebuana Lhuillier.

Si Rosario ay may karanasan bilang kampeon. Natulungan niya ang National University na masugkit ang kampeonato sa UAAP noong nakaraang season. Tinulungan din niyang magkampeon ang Hapee Toothpaste sa PBA -League. At miyembro siya ng RP Team na nagkampeon sa nakaraang Singapore Southeast Asian Games.

Well, hindi naman natin sasabihing palpak sina Tautuaa at Rosario. First game lang naman nila iyon e. Marami pang games silang lalaruin sa PBA at tiyak na magi-improve sila.

Kapag naipagpag na nila ang rookie jitters, siguradong malaki ang maitutulong nila sa kanilang koponan at pakikinabangan sila nang husto ng TNT.

SPORTS SHOCKED – Sabrina Pascua