Ang ‘Playgirls’ Performance ni MMDA Chair Francis Tolentino

Mukhang nasabon nang husto ng Liberal Party (LP) si congressman Benjie Agarao.

Mantakin ninyong magpa-lewd show ba naman at pagsuutin ng t-shirt ni MMDA Chairman Francis Tolentino ang mga babaeng nakapekpek-shorts (Playgirls ba ‘yan?) pagkatapos na pagkatapos ng oathtaking ng LP members.

Hayun napuruhan si Tolentino dahil mismong ang emcee ng programa ang nag-announce na dala umano ni Tolentino ang lewd dancers/performers bilang regalo sa birthday ni Agarao.

Hindi naman tayo ipokrito. Alam nating ‘yan ay katuwaan at bilang pagbibigay kasiyahan sa birthday boy.

Although, iba’t ibang women’s group na nga ang umaalma sa napakasagwang palabas na ‘yan dahil niyurakan pa ang kababaihan.

Pero ‘yang mga ganyang event ay pampribado at hindi dapat inilalantad sa publiko lalo na kung mayroong mga babae at kabataan.

Dapat ‘e ginawa na lang pribado ang pagpapalabas nang ganyan.

Nakapag-aalala tuloy, dahil mukhang ‘yang grupong ‘yan ang gagamitin nila sa kanilang pangangampanya lalo sa malalayong probinsiya.

Sana nga ‘e hindi ikaw ‘yan Chairman Tolentino.

Ang siste, kumalat na sa social media ang napakasagwang pagsasayaw ng mga babae (‘e lewd show nga ‘e).       

Hindi tuloy natin maintindihan kung maiinis tayo o maaawa kay Chairman Tolentino dahil hanggang ngayon o baka hanggang sa mga susunod na araw ay pagpiyestahan ng mga tao ‘yang isyu na ‘yan.

Kamalas mo naman Chairman Tolentino?!

E si Mar Roxas nga, balita natin ‘e biglang lumayas at nabuwisit sa nasabing ‘bastos’ na palabas.

Tsk tsk tsk…

Chairman Tolentino, tayo naman ay walang masamang tinapay, pero sana sa susunod, sabihan mo ‘yang campaign group ninyo na talas-talasan naman ang pag-iisip. Maging sensitibo naman kayo sa kultura ng mga taong pupuntahan ninyo at lagi ninyo iisipin na madali nang mag-upload ng video ngayon sa social media.

Kayo rin, baka biglang maglaho ang mga pinaghirapan ninyo.

Tsk tsk tsk…

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com