HATAW! D'yaryo ng Bayan hatawtabloid.com
PERFECT timing ba ang pagdating ni Pastillas Girl sa It’s Showtime?
Kaya namin ito naitanong ay dahil humahabol na sa ratings game sa kalabang programa ang pantanghaling programa ng ABS-CBN.
Mukhang nahuli nito ang panlasa ng ‘madlang pipol’. Banat ng iba nanggaya raw.
In fairness, malayong-malayo ito sa kalye-serye dahil true to life experience ang kuwento ni Pastillas Girl na ‘di sinasadyang naging viral ang pag-emote sa video na ipinost tungkol sa pagtataksil sa kanya ng ex-boyfriend at kaibigan nito.
Humingi lang naman itong si Angelica Yap aka Pastillas Girl ng advice kay Madam Bertud at mula noon ay maraming nagpadala ng sari-saring opinion sa pamamagitan ng social media.
Hmm, malakas ang appeal ni Pastillas Girl at marami ang gusto siyang makilala dahil marami rin ang naka-relate sa kanyang sinapit kaya’t patok ito sa mga manonood.
Mula noon, ang ‘madlang pipol’ mismo ay nakisali at tumulong sa paghahanap kay Mr. Pastillas.
May magandang leksiyon din itong naituturo na ang pakikipag-kawanggawa, pagpapatawad at “pag-move” on.
Mahirap gawin dahil laging masakit ang kahit ano mang “break-up”, patuloy tayong lumalaban sa buhay at mas nagiging madali nga naman ang problema kapag marami kang karamay.
At sa sitwasyon ni Pastillas Girl, naging kakampi niya ang ‘madlang pipol’ pati na rin ang mga nakatutuwang host ng It’s Showtime na tila naging instant friends at Kapamilya niya.
Kung pagbabasehan ang Kantar national TV ratings ng It’s Showtime, makikitang lumakas ito at pumapalo ng 18.5% noong nakaraang Biyernes kompara sa kalabang programa na pumapalo ng 20.6%. At kahit maraming tumutok sa kalabang programa noong Sabado, hindi natinag ang It’s Showtime at napanatili nila ang mataas nilang ratings na 17.9%.
FACT SHEET – Reggee Bonoan
