Misis, anak ini-hostage ni mister

ROXAS CITY – Nahaharap sa kasong paglabag sa R.A. 9262 o Anti-Violence Against Women and their Children ang dating bodyguard ng alkalde ng Sigma, Capiz makaraan i-hostage ang kanyang mag-ina sa loob ng kanilang bahay kamakalawa.

Nalagay sa alanganin ang buhay ni Mary Jane Gregorio at anak nang i-hostage ng asawa na si Jojo Gregorio habang nasa impluwensiya ng droga.

Agad nagresponde ang mga kasapi ng Sigma PNP sa lugar at isinagawa ang negosasyon, ngunit dumestansiya nang lumabas ang report na armado ng granada ang suspek.

Dumating din sa lugar si Mayor Cris Andaya at umapela sa dating bodyguard na lumabas nang matiwasay ngunit hindi  napilit ng alkalde.

Bago dumilim ay nagdesisyon ang mga pulis kasama ang SAF na pasukin ang bahay ng suspek dahil hindi na sumasagot.

Ngunit wala nang tao sa loob ng bahay nang makapasok ang mga awtoridad.

Nabatid na nakatakas na pala ang suspek gayondin ang asawa at anak na nakituloy sa kapitbahay.