2 rape-slay suspect sa Tanay arestado

TINIYAK na ibibigay ang P50,000 reward sa testigo na nagturo sa dalawang naarestong suspek sa panggagahasa at pagpatay sa 10-anyos batang babae sa Tanay, Rizal.

Kinilala lamang ng mga awtoridad ang mga suspek sa mga alyas na Toto at Dondon habang isinasailalim sa imbestigasyon.

Magugunitang natagpuang naaagnas na ang bangkay ng biktimang si Cazandra Valencia, 10, nang matagpuan sa ilalim ng kawayanan ng kanyang pamilya makaraan ang dalawang araw na pagkakawala.

Dakong 2 a.m. kahapon nang maaresto ng mga pulis ang ang mga suspek sa kanilang hide-out batay sa testimonya at direktang pagturo sa kanila ng testigo.

Ayon sa testigo, nakita niya ang mga suspek nitong nakaraang Huwebes habang karga ang biktimang wala nang malay.

Samantala, sinabi ng ina ng biktima na hindi niya kayang tingnan si alyas Toto dahil inaanak ng suspek ang kanyang nakababatang kapatid.

Sa kabilang dako, itinanggi ng asawa ni alyas Dondon na sangkot ang suspek sa krimen dahil nasa trabaho aniya sa construction site ang kanyang mister nang maganap ang insidente.

Habang tiniyak ni Tanay Mayor Rafael Tanjuatco na ibibigay nila ang reward sa witness sakaling matiyak na ang mga inaresto ang gumahasa at brutal na pumatay sa biktima.