2 patay, 14 sugatan sa truck vs 7 sasakyan

DALAWA ang kompirmadong namatay, kabilang ang isang engineering student, habang 14 ang sugatan makaraang soroin ng isang truck ang pitong sasakyan sa A. Bonifacio Avenue, Marikina City kahapon ng umaga.

Kinilala ng mismong ama ang isa sa dalawang namatay na si Edizon John Reyes, habang kabilang sa 14 sugatan ang driver ng 10-wheeler delivery truck (RHW-112), isinugod sa Amang Rodriguez Memorial Medical Center.

Sa inisyal na imbestigasyon, dakong 11:35 a.m. naganap ang insidente nang mawalan ng preno ang truck habang pababa ng Bonifacio Avenue, Brgy. Barangka, Marikina City mula sa fly-over na umuugnay sa Katipunan, Quezon City.

Ayon sa pulisya, tatlong pampasaherong jeep, dalawang L-300 van at dalawang motorsiklo ang inararo ng killer truck.

Binabantayan ng mga pulis ang suspek habang nilalapatan ng lunas sa ospital.