HATAW! D'yaryo ng Bayan hatawtabloid.com
TOTOO namang hindi mapasusubalian ang kaguwapuhan ni James Reid. Kitang-kita na ito nang una siyang masilip sa Pinoy Big Brothers Teen Clash 2010. Muli itong masisilayan sa pinakabago niya at kauna-unahang teleserye sa ABS-CBN2, ang On The Wings Of Love kasama si Nadine Lustre.
Ayon sa mga nanood ng advance screening nito, kitang-kita raw ang sobrang kaguwapuhan ng actor sa teleseryeng ito kaya naman tiyak na marami ang kikiligin bukod pa sa maganda ang kuwento nito ukol sa pamilya, pangarap, at pag-ibig.
Mapapanood na ang On The Wings of Love simula sa Lunes (Agosto 10).
Bibigyang buhay ni Nadine ang karakter ni Leah, isang dalagang puno ng pangarap na nais makarating ng Amerika para makatulong sa kanyang pamilya. Gagampanan naman ni James ang papel ni Clark, isang binata na lumaki sa Amerika na nais bigyan ng magandang buhay ang mga kapatid na nasa Pilipinas matapos mamatay ang kanilang ina.
Sa pagtupad ng kanyang American dream, haharapin ni Leah ang isang malaking problema dahil sa nalalapit na pag-expire ng kanyang visa. Upang manatili sa bansang kanyang pinapangarap, makikipagkasundo si Leah sa American citizen na si Clark para magpakasal kapalit ng perang kinakailangan nito.
Sa isang linggong ipinanood, lalong pinahanga nina direk Antoinette Jadaone at Jojo Saguin ang viewers dahil sa kakaibang approach nito. Kaya huwag kaligtaang tutukan ang On the Wings of Love na binubuo rin ng iba pang pinakahinahangaang aktor sa industriya kabilang sina Joel Torre, Bianca Manalo, Albie Casino, Nanette Inventor, Nico Antonio, Jason Francisco, Nhikzy Calma, Andrei Garcia, Laiza Comia, at Cherry Pie Picache. Kasama rin sina Isay Alvarez at Katya Santos para sa kanilang espesyal na pagganap.
Ang On the Wings of Love ay sa ilalim ng produksiyon ng Dreamscape Entertainment Television.
SHOWBIZ KONEK – Maricris Valdez Nicasio
