Mag-ate nagkagatan nagputulan ng tenga (Dahil sa 62-anyos DOM)

NAPUTOL ang tenga ng magkapatid makaraan magkagatan dahil sa agawan sa 62-anyos dirty old man (DOM) sa Oton, Iloilo kamakalawa.

Ayon sa pulisya, sinugod ni Kemme Salmon, 36-anyos, sa Oton Public Market ang nakababatang kapatid na si Elsie Marsilo, 34, dahil sa pagsulot sa kanyang dating nobyo.

Iniuntog ni Kemme ang ulo ng kapatid sa semento bago kinagat ang kanang tenga ng kapatid. Ngunit gumanti si Elsie na kinagat sa kaliwang tenga ang kanyang ate.

Parehas putol ang tenga ng mag-utol at kapwa ginagamot sa Oton Municipal Health Center.

Ugat ng away ng magkapatid ang 62-anyos na si Cornelio Clavel, dating nobyo ni Kemme. Depensa ni Elsie, magkaibigan lamang sila ng lalaki. May kanya-kanyang asawa at pamilya ang magkapatid, maging si Clavel.

Isasailalim sa counselling ng Oton Municipal Social Welfare and Development Office ang magkapatid para resolbahin ang kanilang gusot.

 

HATAW News Team