Pangasinan mayor sinibak sa dual citizenship

DAGUPAN CITY – Iniutos ng Second Division ng Commission on Elections (Comelec) ang pagtanggal sa puwesto kay Basista Pangasinan Mayor Manolito de Leon makaraan aprobahan ang kanselasyon ng certificate of candidacy (COC) niya sa pagtakbo sa puwesto noong 2013 dahil sa pagiging American citizen.

Sa resolusyong ipinalabas noong Enero 27, inihayag ng Comelec na si De Leon ay diskwalipikado at pinagbabawalan na ring tumakbo at humawak ng ano mang posisyon sa gobyerno.

Kasabay nito, idineklara ang isa sa dalawang nakatunggali niya na si Jocelyn O. Perez, bilang bagong elected mayor.

Nabigyan na rin ng kopya ng resolusyong ipinalabas at nilagdaan nina Commissioners Elias R. Yusoph, Luietito Z. Guia at Arthur D. Lim, ang bagong alkalde nito lamang Pebrero 11 ng taon kasalukuyan.

Inatasan na ng Comelec ang local Comelec office ng Basista na bumuo ng Special Board of Canvassers para muling magpulong sa pagproklama kay Perez bilang newly elected municipal mayor.

Ang naturang disqualification case ay isinampa noong Mayo 6, 2013 laban kay De Leon dahil sa pagkakaroon niya ng dual citizenship na paglabag sa Local Government Code ng bansa.