Lanao Del Norte vice mayor nagbaril sa sarili (Pinasasagot ng Ombudsman)

CAGAYAN DE ORO CITY – Bunsod nang sobrang pagkabalisa at kalungkutan, nagbaril sa sarili ang isang  bise-mayor mula sa bayan ng Maigo, Lanao del Norte kamakalawa.

Kinilala ang biktimang si Elmer Ramos, nasa pangalawang termino na sana bilang vice mayor sa kanilang bayan.

Inihayag ni Lanao del Norte Provincial Police Office director, Senior Supt. Madid Paitao, batay sa inisyal na pagsisiyasat ng pulisya, maaaring nag-suicide ang biktima dahil walang indikasyon na nag-struggle siya bago natagpuang patay sa kanyang kuwarto.

Tinamaan ang biktima ng isang bala sa kaliwang bahagi ng ulo at tumagos ito. 

Narekober sa crime scene ang fired cartridge ng kalibre .45 at maging ang ginamit na baril.

Salaysay ng opisyal, pinasasagot ang biktima ng Ombudsman ukol sa kasong isinampa ng isang dating barangay kapitan na kanyang tinanggal sa puwesto ilang taon na ang nakalilipas.