Meralco itutuloy ang winning streak

ni SABRINA PASCUA

HANGAD ng Meralco na palawigin pang lalo ang winning streak nito sa paghaharap nila ng Rain Or Shine sa PBA Commissioner’s Cup mamayang 4:15 pm sa Smart Araneta coliseum sa Quezon City.

Ikalawang sunod na panalo naman ang nais na maitala ng Alaska Milk kontra sa sumasadsad na Globalport sa 7 pm main game.

Ang Bolts, na pinamumunuan nina Josh Davis at Gary David, ay nagtala ng tatlong sunod na panalo laban sa Barangay Ginebra (85-74), Kia Carnival (90-80) at Talk N Text (91-83). Kasalukuyan silang nasa itaas ng standings kasama ng defending champion Purefoods Star.

Pero hindi basta-bastang kalaban ang Rain Or Shine. Ang Elasto Painters ay naungusan ng Talk N Text, 87-86sa kanilang unang laro subalit nakabawi sa pamamagitan ng dikit na mga panalo kontra sa NLEX (96-91) at Globalport ( 104-98).

“It’s good to win close games. They build character. But sometimes who have to win handily. That’s because if you put yourself in a position where you can lose, then you will lose,” ani RoS coach Joseller “Yeng” Guiao.

Sa tatlong laro, ang 6-6 1/2 na si Davis ay nag-average ng 16.67 puntos at 20 rebounds. Si David, isang two-time scoring champion ng liga, ay may 21 puntos kada laro.

Katuwang nina Davis at David sina Cliff Hodge, John Wilson, Reynell Hugnatan at Mike Cortez.

Ang Elasto Painters ay sumasandig sa import na si Rick Jackson na sinusuportahan nina Paul Lee, Jeff Chan, Gabe Norwood, Ryan Arana at Beau Belga.

Ang Alaska Milk ay tinambakan ng defending champion Purefoods Star, 108-88 sa kanilang unang laro. Pumasok sila sa win column noong Sabado nang maungusan ang NLEX, 96-95.

Patuloy na hindi nakapaglalaro para sa Aces sina lead point guard JVee Casio at sentrong si Joaquim Thoss.

Sa import match-up ay magtutunggali sina DJ Covington ng Aces at CJ Leslie ng Batang Pier.

Nagwagi ang Globalport kontra KIA Carnival, 100-89 sa una nilang laro. Pero matapos iyon ay natalo ang Batang Pier sa Purefoods Star (83-70) at Rain Or Shine.